चिशंखुगढीमा अपाङ्गता पहिचान शिविर हुदै, नयाँ अपाङ्गता कार्ड वितरण गरिने 

१५ वैशाख, सोलुुखुम्बु । ओखलढुङ्गाको चिशंखुगढी गाउँपालिकामा अपाङ्गता पहिचान तथा परिचयपत्र वितरण शिविर सञ्चालन हुने भएको छ ।  करुणा फाउण्डेसन नेपाल, कोशी प्रदेश र स्थानीय सरकार चिशंखुगढी गाउँपालिकाको त्रिपक्षिय साझेदारीमा सञ्चालित अपाङ्गता रोकथाम तथा पुनर्स्थापना शिविर कार्यक्रम अन्तर्गत अपाङ्गता पहिचान तथा परिचयपत्र वितरण शिविर गाउँपालिकाका सबै वडामा सञ्चालन हुने भएको हो । गाउँपालिकाले यहि बैशाख २७ गते देखी गाउँपालिकाका ८ वटै वडामा यो शिविर सञ्चालन गर्ने गाउँपालिकाका प्रमुख प्रशासकीय अधिकृत सिताराम राईले जारी गरेको सूचनामा उल्लेख छ ।  

शिविरमा विशेषज्ञ चिकित्सक बाट प्रारम्भिक स्वास्थ्य परिक्षण गराई आवश्यकता बमोजिम परिचय पत्र बितरण गरिने उहाँले जारी गरेका सूचनामा उल्लेख छ । पहिलो दिन बैशाख २७ गते गाउँपालिकाको वडा नम्बर ६ भदौरे वडा कार्यालयमा शिविर सञ्चालन हुने जनाइएको छ ।

यस्तै २८ गते वडा नम्बर २ पोखरे, २९ गते वडा नम्बर १ कुइभिर, ३० गते वडा नम्बर वडा नम्बर ३ दियाले, ३१ गते वडा नम्बर वडा न्म्बर ५ सेर्ना, जेठ १ गते वडा नम्बर ४ रातमाटे, जेठ २ गते वडा नम्बर ७ माम्खा र जेठ ३ गते वडा नम्बर ८ माम्खामा शिविर सञ्चालन हुने छ ।  

गाउँपालिकाका अनुसार वडा नम्बर १ को अपाङ्गता पहिचान शिविर कुइभीर माविमा सञ्चालन हुने छ भनेअन्य ७ वटै वडाको शिविर सम्बन्धित वडा कार्यालयमा सञ्चालन हुने छ । यस्तै शिविरमा गाउँपालिकाले यसअघि महिला तथा बालबालिका कार्यालय ओखलढुङ्गाबाट जारी गरिएका अपाङ्गता कार्डबाट सामाजिक सुरक्षा भत्ता लिइरहेका हरूलाई समेत नयाँ कार्ड वितरण गर्ने जनाएको छ ।