थामेको अवलोकन गर्न आएको रक्षामन्त्रीको टोलीले प्रधानमन्त्रीलाई प्रतिबेदन बुझाउँदै

भदौ २, सोलुखुम्बु । पर्यटकीय जिल्ला सोलुखुम्बुको खुम्बु पासाङल्हामू गाउँपालिका–५ थामेमा आएको बाढी अवलोकन गरी फर्किएको टोलीले आज प्रधानमन्त्री केपी शर्मा ओलीलाई प्रतिवेदन बुझाउने भएको छ । शनिबार रक्षामन्त्री मानवीर राईसहितको टोलीले थामे क्षेत्रको अवलोकन गरेको थियो । गत शुक्रबार दिउँसो थामे खोलामा आएको बाढीले १३ घरमा पूर्ण क्षति पुगेको छ भने थामे बजार पूरै अस्तव्यवस्त बनाएको छ ।

रक्षामन्त्री राईले थामे खोलाको शीरमा रहेको दुई वटा ताल फुटेर बाढी आएको पाइएको बताउनुभएको । बाढीका कारण थामे क्षेत्रको विद्युत पनि अहिले अवरुद्ध रहेको उहाको भनाई छ । बाढीले एउटा आधारभूत विद्यालय र क्लिनिकमा पनि क्षति पुर्याएको पाइएको मन्त्री राईले बताए । स्थलगत भ्रमणको रिपोर्ट प्रधानमन्त्री केपी शर्मा ओलीलाई आज बुझाउने तयारी रहेको उनले बताए ।

आफूहरुको उपस्थितिमै गाउँपालीकाले ५० हजार र जिल्ला प्रशासन कार्यालयले १५ हजारका दरले पूर्ण रुपमा क्षती भएका १३ घर परिवारलाई राहत उपलब्ध गराइएको मन्त्री राइले बताए । बाँकी राहत र पुनर्निर्माणबारे प्रधानमन्त्रीलाई रिपोर्ट बुझाइसकेपछि निर्णय हुने उनको भनाइ छ । शनिवार रक्षामन्त्री राई सहित जिल्ला प्रशासन कार्यालय सोलुखुम्बुका प्रमुख जिल्ला अधिकारी सहितको टोली थामे क्षेत्रको अवलोकन गर्न पुग्नुभएको थियो ।