खुम्बु अवलोकन टोलीको सुझाव ः हिमताल जोखीमबारे अध्ययन गर्नुपर्छ

भदौ २, सोलुखुम्बु । गत ३२ गते खुम्बुमा २ वटा हिमताल फुटेर बस्ती नै तहसनहस बनाएपछि पछि बल्ल सुरक्षाको ढ्याङ्ग्रो बजेको छ । हिमताल फुटेपछि सोलुखुम्बुबाट निर्वाचित माननिय था रक्षा मन्त्री मानविर राईले आफै आएर अवलोकन गरेर शनिवार काठमाण्डौ फर्कनुभएको थियो ।

त्यसपछि घटनाको बारेमा सरकारका प्रधानमन्त्रीलाई ध्यानाकर्षण गराउन एउटा प्रतिबेदन मन्त्री राईले प्रधानमन्त्रीलाई दिनुभएको छ । उहाँले अव पनि हिमताल फुट्न सक्ने भन्दै यसको जोखीमबारे अध्यन गर्ने सुझाव सहितको प्रतिबेदन दिनुभएको हो ।

घटनास्थलमा पुगेर फर्किएका रक्षामन्त्री मानवीर राई, जनप्रतिनिधि र सम्बन्धित निकायका उच्च अधिकारीले प्रधानमन्त्री तथा मन्त्रिपरिषद्को कार्यालय, सिहंदरबारमा प्रधानमन्त्री केपी शर्मा ओलीलाई क्षतिको विस्तृत विवरण लिएर सम्भावित जोखिमको अवस्थाबारे विभिन्न क्षेत्रका विषय विज्ञ टोलीबाट अध्ययन हुनुपर्ने भन्दै स्थलगत प्रतिवेदन दिएको हो । प्रतिवेदनमा तत्कालका लागि खाद्यान्न लगायतका राहत र क्षतिपूर्तिका साथै बिजुली, टेलिफोनलगायत अत्यावश्यक सेवा सञ्चालन हुनुपर्ने उल्लेख छ ।

हिमताल बिस्फोटबाट भएको क्षतिको प्रारम्भिक विवरणबारे जानकारी लिंदै प्रधानमन्त्रीलेसंघीय सरकारका तर्फबाट तत्काल गर्नुपर्ने काम र निर्णयहरु गर्ने प्रतिवद्धता व्यक्त गरे । त्यहाँ रक्षामन्त्री राई, संघीय सांसद सोनाम गेल्जेन शेर्पा, कोशी प्रदेशसभा सदस्य बुद्धिबहादुर राजभण्डारी, मुख्यसचिव लीलादेवी गड्तौला, राष्ट्रिय विपद् जोखिम न्यूनीकरण तथा व्यवस्थापन प्राधिकरणका कार्यकारी प्रमुख अनिल पोखरेल, खुम्बु पासाङल्हामु गाउँपालिकाका अध्यक्ष मिङ्मा छिरी शेर्पा, उपाध्यक्ष टासी ल्हमु शेर्पालगायत उपस्थित थिए ।

हिमताल फुटेपछिको बाढी र पहिरोका कारण १७ घर र एक विद्यालय क्षतिग्रस्त भएको थियो । दिउँसोको समयमा घटना भएको र पूर्व सूचना प्रणाली अपनाइएकाले मानवीय क्षति हुनबाट जोगिएको प्रतिवेदनमा उल्लेख छ ।