मोरङ्गमा मौलायो लागूऔषध बिक्री वितरण र बन्यजन्तु चोरी सिकारी

मोरङ संवाददाता, भाद्र ४ । इलाका प्रहरी कार्यालय पथरीले एकहप्तामै  लागूऔषध तस्करी र वन्यजन्तु अपराध विरुद्ध उल्लेखनीय सफलता हासिल गरेको छ । कार्यालय प्रमुख भएर भखरै इलाका प्रहरी कार्यालय पथरी आएका डीएसपी मोहन विक्रम दाहालको नेतृत्वको टोलीले उल्लेखनीय सफलता हासिल गरेको हो ।

आइतबार इलाका प्रहरी कार्यालय पथरीले कार्यालयमा पत्रकार सम्मेलनको आयोजना गरेर विभिन्न स्थानबाट ६ वटा घटनामा पक्राउ गरिएको १३ जना लागु आषध प्रयोगकर्ता र बन्यजन्तु चोरी सिकारी गर्ने गिरोह सार्वजनिक गरेको छ । प्रहरीले उनीहरूको साथबाट ब्राउन सुगर, सालकको खपटा, उनीहरूले प्रयोग गर्ने भारतीय मोटर साइकल र अटो पनि बरामद गरेको पत्रकार सम्मेलन मार्फत जानकारी गराइएको छ ।
प्रहरी पथरीले भाद्र १ गते मोरङको कानेपोखरी गाउँपालिका वडा नं. ७ बाट  दुई जनालाई अवैध वन्यजन्तु सालकको ८५० ग्राम खपटासहित पक्राउ गरेको थियो । रङ्गेली नगरपालिका –१ बस्ने बर्ष ४५ को गगन गच्छदार र सप्तरी जिल्ला कञ्चनपुर नगरपालिका वडा नं. ५ बस्ने बर्ष ३५ को बासुदेव सरदारलाई पक्राउ गरेको हो । उनीहरूले प्रयोग गरेका प्रदेश १–०२–०५२ प ११६७ नम्बरको मोटर साइकल पनि बरामद गरिएको छ ।

त्यस्तै, भदौ १ गते अवैध प्लाष्टिकको बोरामा २ केजी ९ केजी ८८ ग्राम, सेतो प्लाष्टिकमा ७४४ ग्राम, कालो प्लाष्टिकमा ८७२ ग्राम गरी जम्मा ४ केजी ५८४ ग्राम सालकको खपेटा सहित तीन जनालाई प्रहरीले पक्राउ गरेको छ । उदयपुर बेलका –३ बस्ने बर्ष ४८ को कृष्णराज मगर, बेलका –६ बस्ने डिक बहादुर पुर्व छाने मगर र सप्तरी कृष्णसवरण गाउँपालिका वडा नं. १ बस्ने बर्ष ५५ को उमेश प्रसाद चौधरीलाई दिउँसो ३ बजे प्रहरीले पक्राउ गरेको थियो ।

त्यस्तै साउन ३० गते पथरी शनिश्चरे –४ बस्ने बर्ष ३२ को सिमन परियारलाई लागू औषध सहित प्रहरीले पक्राउ गरेको थियो  । ट्रमाडोल १ हजार १ सय १० क्याप्सुल र डिकोलिक ६ हजार ६ सय  चक्की सहित परियारलाई विहान ९ः३० बजे पक्राउ गरिएको प्रहरीले बताएको छ । पथरी शनिश्चरे –६ बस्ने हेमराज चन्द्रबंशीलाई दिँदै गरेको अवस्थामा पक्राउ गरेको हो भने हेमराज चन्द्रबंशी भने फरार रहेको इप्रका पथरीका डीएसपी मोहन विक्रम दाहालले बताए । लागूऔषध बोकेको परियारको को २ ह १६१५ नम्बरको अटो पनि प्रहरीको नियन्त्रणमा छ ।

यस्तै गत साउन ३१ गते भारतबाट नेपालमा लागूऔषध बिक्री गर्न आएका तीन भारतीय नागरिकलाई १० ग्राम ब्राउन सुगरसहित पक्राउ गरिएको थियो । साँझ ६ ः३० बजेको समयमा विहार प्रान्त जिल्ला अररिया बस्ने बर्ष २४ को मिथलेश कुमार मण्डल, बर्ष २६ का भास्कर कुमार शर्मा र बर्ष २५ को सौरव कुमार पासवानलाई पक्राउ गरेको हो । उनीहरुले प्रयोग गरेका बिआर ३८ एल ९३०९ नम्बरको भारतीय मोटरसाइकल पनि बरामद गरेका थिए । यसैगरी, साउन २० गते मोरङको पथरी शनिश्चरेमा दुई जना भारतीय नागरीकलाई ७ ग्राम १७ मिलिग्राम (ब्राउन सुगर) लागूऔषध सहित पक्राउ गरिएको थियो । उनीहरलाई साँझ ६ ः३० बजे पथरी शनिश्चरे–१० बाट रङ्गेली नगरपालिका वडा नं. ७ बस्ने बर्ष २४ को अभय कुमार भास्कर र सुनबर्षी नगरपालिका –७ बस्ने बर्ष १९ को हयत अलीलाई पक्राउ गरेको थियो । उनीहरूले प्रयोग गरेका बिआर ३८ डी ७८८९ नम्बरको भारतीय मोटरसाईकल पनि बरामद गरेका थिए । मोटरसाईकलको इन्डीकेटरमा लुकाई छिपाई बिक्रि गर्न ल्याउर्दै गर्दा प्रहरीले पक्राउ गरेको हो ।
त्यस्तै साउन २१ गते एक जना युवालाई ४ ग्राम ४८० मिलिग्राम(ब्राउन सुगर) लागूऔषध सहित पक्राउ गरिएको थियो । पथरी शनिश्चरे –८ बस्ने वर्ष २५ को दिपेश माझीलाई पक्राउ गरिएको हो । माझीलाई राती ११ः३० बजे पक्राउ गरिएको थियो । त्यस्तै साउन १९ गते ४ ग्राम ९५ मिलिग्राम(ब्राउन सुगर) लागूऔषध सहित भारत अररिय बस्ने २१ बर्षीय मोहम्द ईसराकलाई पक्राउ गरिएको थियो । उनलाई दिउँसो २ बजे कानेपोखरी गाउँपाकिला वडा नं. २ बाट पक्राउ गरिएको हो । उनको साथबाट लागूऔषध सहित बिआर ३८ डि एबि ४१३५ नम्बरको भारतीय मोटरसाईकल पनि बरामद गरेका थिए ।

वन्यजन्तु तस्करी सम्बन्धी प्रहरीले वन कार्यालयसँग समन्वय गरी अनुसन्धान अघि बढाएको जनाएको छ भने लागूऔषध लगाएत सबै घटनाहरूमा थप अनुसन्धान भइरहेको इप्रका प्रहरीले जनाएको छ