तापक्रम वृद्धि हुँदा हिमताल विस्फोट भएको प्राधिकरणको निष्कर्ष, थप जाेखीमबारे अध्ययन गर्न टाेली पठाइँदै

भदौ ५, सोलुखुम्बु । थामे हिमताल विस्फोट जलवायु परिवर्तनका कारण भएको राष्ट्रिय विपद जोखीम न्यूनिकरण तथा व्यवस्थापन प्राधिकरणले निष्कर्ष निकालेको छ ।  आज प्राधिकरणले गरेको पत्रकार सम्मेलन मार्फत प्राधिकरणका कार्यकारी प्रमुख अनिल पोखरेलले थामे बाढीको प्रारम्भिक निरीक्षण गर्दा हिमताल फुट्नु जलवायु परिवर्तनका कारण  तापक्रम वृद्धि हुँदा ग्लेसियर र पर्माफ्रोष्ट पग्लनु मुख्य कारण रहेको निष्कर्ष  निकालिएको बताउनुभएको हो ।

उहाँले थामे क्षेत्रमा अन्य विभिन्न हिमताल फुट्ने जोखिम कायमै रहेको भन्ने कुरालाई ध्यानमा राख्दै विस्तृत अध्ययनका लागी प्राविधक टोली पठाउने तयारी भइरहेको पनि उहाँले बताउनुभयो ।  यस्तै बाढीको कारण क्षति भएको सोही ठाउँमै बस्न मिल्ने हो वा त्यहाँको बस्ती अन्तै सार्नु पर्ने हो भन्नेबारे पनि अध्ययन गरिने कार्यकारी प्रमुख पोखरेलले बताउनुभयो ।

गत साउन ३२ गते थामे गाउँमाथिबाट आएको बाढीले उक्त गाउँका अधिकांस घर डुवानमा पारेको थियो । बाढीका कारण गाउँ डुवानमा परेसँगै अहिले थामेबासी थप हिमताल फुट्न सक्ने  चिन्तामा छन ।