दुधकोशी अस्पतालमा शल्यक्रिया मार्फत पाचौं प्रसुती सफल

भदौ ६, सोलुखुम्बु । सोलुखुम्बुको थुलुङ दुधकोशी गाउँपालिका स्थित दुधकोशी अस्पतालबाट पाचौं पटक सफल शल्यक्रिया मार्फत प्रसुती गराइएको छ । थुलुङ दुधकोशी गाउँपालिकामा सञ्चालित दुधकोशी अस्पतालमा प्रसूती सेवा सुरु भएपछि शल्यक्रिया मार्फत पाँचौ पटक सफल प्रसूति गराउन सफल भएको अस्पतालले जनाएको हो ।

थुलुङ दुधकोशी गाउँपालिका ८ देउसाकी २५ वर्षीया अस्मिता तामाङको शल्यक्रिया बिहीबार बिहान सफलतापूर्वक सम्पन्न भएको अस्पतालका डाक्टर अजय चौधरीले जानकारी दिनुभयो । उहाँका अनुसार अस्मिताको डेलिभरी डेट पुगिसकेको थियो तर, बच्चा पैदा हुन सकेको थिएन ।

औषधि चलाएर पनि व्यथा नलागेपछि शल्यक्रिया नै गर्नुपर्ने भएको थियो । बच्चाको तौल चार केजी तीनसमय ग्राम थियो । सामान्यतया बच्चाहरूको तौल ३२ सय ग्राम हाराहारी मात्रै हुन्छ । यो शल्यक्रिया पाँचौँ भएको गाउँपालिका अध्यक्ष असिम राईले जानकारी दिनुभयो ।

यसअगावै चारवटा एलएससीएस सर्जरी सफलतापूर्वक सम्पन्न भइसकेका छन् । गाउँपालिका केन्द्र मुक्लीमै यस्तो जटिल प्रकारका शल्यक्रिया हुन थालेपछि गाउँपालिकाका बासिन्दा लाभान्वित हुँदै आएका छन् ।