मौवाबोटे वडा कार्यालय भवन उद्घाटन, सेवा प्रवाहमा सहजता हुने  पालीका अध्यक्ष बञ्जाराकाे विश्वास 

भदौ १५, सोलुखुम्बु ।  खोटाङको बराहपोखरी गाउँपालिका वडा नम्बर ६ को वडा कार्यालयको प्रशासनिक भवन उद्‌घाटन गरिएको छ ।  गाउँपालिका अध्यक्ष शालिकराम बञ्जाराले शुक्रबार वडा नम्बर ६ मौवाबोटेका प्रशासनिक भवनको उद्‌घाटन गर्नुभएको हो ।

 गाउँपालिकाको ४५ लाख रुपैयाँ र जनश्रमदान मार्फत ४ लाख ५० हजार गरि जम्मा ४९ लाख ५० हजार रुपैयाँको लागतमा वडाको २ तले प्रशासनिक भवन निर्माण सम्पन्न भएको वडा अध्यक्ष दुर्गा बहादुर राईले जानकारी दिनुभयो ।

गत आर्थिक वर्ष २०८०/८१ मा गाउँपालिकाले विनियोजन गरेको बजेट मार्फत बनेको वडा कार्यालय भवन उपभोक्ता समितिले निर्माण गरेको अध्यक्ष राईको भनाई छ ।  गत चैत्र बाट सुरु गरेर २०८१ असार अर्थात ३ महिनामै काम सम्पन्न गरेर वडा कार्यालयलाई उपभोक्ता समितिले हस्तान्तरण गरेको थियो ।

यस अघि साविकको गाउँ विकास समितिको कार्यालयमा वडा कार्यालय स्थापना गरि सेवा दिइँदै आएकोमा अव भने  प्रशासनीक भवन निर्माण सम्पन्न भएर सोही भवनबाटै सेवा प्रवाह सुरु गरिएको जनाइएको छ ।

 नयाँ भवनबाट कार्यालय सञ्चालन भएपछि जनतालाई सेवा दिन पनि सहज भइरहेको अध्यक्ष राईले बताउनुभयो  । भवन उद्‌घाटन कार्यक्रम गाउँपालिका अध्यक्ष बञ्जाराको प्रमुख आतिथ्यतामा सम्पन्न भएको थियो । अध्यक्ष बञ्जाराले वडा कार्यालय भवनबाट नागिरकलाइ सेवा दिन सहजता हने भन्दै भवन निर्माणमा खट्ने वडा अध्यक्ष राइ, लगायत वडाका जप्रतिनिधी तथा कर्मचारीलाई धन्यवाद दिनुभएको छ ।