थामे पुनर्स्थापनाका लागी  खुम्बु पासाङल्हामु गाउँपालिकाले छुट्यायाे ७ करोड १० लाख बजेट

भदाै १७, सोलुखुम्बु ।  थामे बाढीले पु¥याएको क्षति पछिको पुनर्स्थापनाका लागी खुम्बु पासाङ ल्हामु गाउँपालिकाले ७ करोड १० लाख  रकम विनियोजन गरेको छ । गाउँपालिका अध्यक्ष मिङ्मा छिरी शेर्पाको अध्यक्षतामा सोमबार बसेको गाउँपालिकाको विशेष अधिवेशनले चालु आर्थिक वर्षका लागी निर्धारण गरिएका विभिन्न १० वटा योजनाहरूलाई रकमान्तर गरि पुनर्स्थापना र उद्धारमा खर्च गर्ने निर्णय गरेको  हो ।

थामे नगरीमा बाढीको वितण्डा पछि भएका क्षतिको पुनर्संरचना र थामेबासीको पुनर्स्थापनाका लागी अधिवेशनले गाउँपालिकामा सञ्चालन हुने फोहोर व्यवस्थापनका लागी उपयुक्त उपकरण खरिद तथा व्यवस्थापनका लागी छुट्टाएको ८ लाख, दिङ्बोचे लबुचेमा सिजनल स्वास्थ्य शिविर सञ्चालनका लागी छुट्टाएको २० लाख, स्पोट टरिजा एवं साहसिक पर्यटन सम्भाव्यता अध्ययनका लागी छुट्टाएको १० लाख, सडकमा झरेको पहिरो पन्छाउने कामका लागी छुट्टाएको ७ लाख, बोसुम नाम्चे रोपवे सम्भाव्यता अध्ययन तथा डिपिआरका लागी छुट्टाएको २० लाखलाई रकमान्तर गर्ने भएको हो ।  

यस्तै जनप्रतिनिधि तथा कर्मचारीका लागी कानुनी सचेतना तालिम सञ्चालनका लागी छुट्टाएको १० लाख, सबै वडामा रेडियाे सेट व्यवस्थापनका लागी छुट्टाएको २० लाख, जनप्रतिनिधि तथा कर्मचारीको अध्ययन तथा अवलोकन भ्रमणका लागी विनियोजित १५ लाख माझखोला मिनिहाइड्रो र आमादब्लम मिनिहाइड्राेमा छुट्टाएको समान ३० लाख गरि जम्मा ७ करोड १० लाख रकम रकमान्तर गरि पुनर्स्थापनामा खर्च गरिने निर्णय भएको गाउँपालिकाका प्रवक्ता ल्हाक्पा छिरी शेर्पाले बताउनुभयो ।  

रकमान्तर गरिएको रकमलाई बाढी प्रभावित क्षेत्रमा सार्वजनिक क्षेत्रको पुननिर्माणका लागी ३ करोड ४० लाख, बाढी पीडितहरूको पुनर्स्थापना र पुननिर्माणका लागी २ करोड ६० लाख, खुम्बु क्षेत्रमा हुन सक्ने विपद जोखिम अध्ययन अनुसन्धानमा ५० लाख खुम्बु विजुली पुननिर्माणमा सहयोगका लागी ६० लाख खर्च गरिने उहाँको भनाई छ ।

 यस्तै गाउँसभाको सोमबारको बैठकले विपद जोखीम न्युनिकरण तथा व्यवस्थापन ऐन २०७९ को दफा १८ र प्रकोप व्यवस्थापन कार्ययोजना विनियम २०७४ को परिक्षेद ७ को ७.१ अनुसार थामे बाढी प्रभावित मध्ये पूर्ण क्षती भएकालाई ५० हजार र आंशिक क्षती व्यहोरेका लाई १० हजार वितरण गर्ने निर्णय अनुमोदन गरेको छ । यस्तै सभाले बाढीका कारण क्षति भएका विद्यालयको अस्थायी व्यवस्थापन कालगी व्यवस्थापन गर्ने, सडक बाटोमा भएको क्षतिलाई पुननिर्माण गर्ने गरि भएको सम्झौता लगायतलाई अनुमोदन गरेको छ ।