कांग्रेस नेता कार्कीले गरे, हजुर बुबाको स्मृतिमा अक्षय कोष स्थापना

भदौ २२,सोलुखुम्बु ।  समाजसेवी एवं नेपाली कांग्रेसका नेता प्रकाशसिंह कार्कीले स्वर्गीय हजुरबुबाको स्मृतिमा अक्षय कोष स्थापना गर्नुभएको छ ।  कार्कीले हजुरबुबा रामबहादुर कार्कीको स्मृतिमा अक्षयकोष स्थापना गर्नुभएको हो ।

नेचासल्यान गाउँपालिका वडा नम्बर २ स्थि बी.पी संस्कृत माध्यमिक विद्यालयमा १ लाख ११ हजार १ सय ११ रुपैयाँको अक्षय कोष स्थापना गरिएको विद्यालयका प्रध्यानध्यापक उमाकान्त काफ्लेले जानकारी दिनुभयो ।

उहाँका अनुसार कार्कीका तर्फबाट स्थानीय अर्का समाजसेवी प्रभुराम कार्कीले सो रकम बराबरको चेक विद्यालयलाई हस्तान्तरण गर्नुभएको हो । बी.पी संस्कृत मावि कार्कीका स्वर्गीय हजुरबुबा रामबहादुर कार्की र स्थानीय धोकलसिं खत्रीको पहलमा स्थापना भएको थियो ।

वि.सं १९५८ सालमा तत्कालीन प्रधानमन्त्री ३ देव सम्शेर राणाको निर्देशनमा खोलिएका १०० वटा आधारभूत पाठशालामध्ये यस विद्यालय पनि एक हो । समाजसेवालाई प्राथमिकतामा राखेर आफ्नो राजनीतिक गतिविधि अगाडी बढाउँदै आउनुभएका कांग्रेस नेता कार्कीले जिल्लाका विभिन्न विद्यालयका विद्यार्थीहरुलाई शैक्षिक सामाग्री समेत बितरण गर्दै आउनुभएको छ ।

प्रधानाध्यापक काफ्लेका अनुसार भवनाथ निरौला तथा उहाँका धर्मपत्नीहरुको नाममा उहाँका छोरा पुन्यप्रसाद निरौला लगायत परिवारका सदस्यहरुले पनि विद्यालयलाई अक्षयकोषका लागि १ लाख ६५ हजार बराबरको चेक हस्तान्तरण गर्नुभएको जनाईएको छ ।