धार्मिक पर्यटन प्रवर्द्धन गर्न हलेसीमा साढे ८ करोडको योजना शिलान्यास

भदौ २२, सोलुखुम्बु । प्रसिद्ध त्रि–धार्मिक स्थल हलेसीमा साढे ८ करोडको योजना शिलान्यास भएको छ । हलेसी बजार परिसर सडक ढलान, पर्यटकीय स्थल रक गार्डेन जाने सडक ढलान लगायतको योजना पूर्व सहरी विकास मन्त्री माननीय सीता गुरुङले शुक्रबार शिलान्यास गर्नु भएको हो ।

चन्द्र ज्योति कन्स्ट्रक्सनले भ्याटसहित ८ करोड, ३९ लाख, ५१ हजार ७७४ रुपैयाँमा ठेक्का सम्झौता गरेको उक्त योजना अन्तरगत बजार एवं मन्दिर परिसरको सडक ढलान गरेर त्यसमाथि आकर्षक ढुंगा बिछ्याइने हलेशी तुवाचुङ नगरपालिकाकी मेयर बिमला राईले जानकारी दिनुभयो ।

सोही योजना अन्तरगत मध्यपहाडी लोकमार्गबाट पर्यटकीय स्थल रक गार्डेन जाने १२ सय मिटर सडक ढलान हुने मेयर राईको भनाई छ । यसैगरी हलेसी प्रवेश गेट नजिकै सवारी साधन पार्किङ स्थल निर्माण गर्नु २०८१ जेठ २९ गते ठेक्का सम्झौता भएको सघन सहरी तथा भवन निर्माण आयोजना ओखलढुंगाका इन्जिनियर गणेस पाण्डेले बताउनुभयो ।

गत आर्थिक वर्ष २०८०-०८१ मा उक्त योजनाका लागि बजेट विनियोजन भएको थियो । त्रि धार्मिक स्थल हलेशी मन्दिरमा देश तथा विदेशबाट दर्शन एवं भ्रमण गर्न हलेसीमा पर्यटकहरु आउने गरेका छन् । तर, मन्दिर परिसरको सडक व्यवस्थित नहुँदा असहज हुने गरेको हलेसी तुवाचुङ नगरपालिकाका मेयर विमला राईले बताउनुभयो ।

शिलान्यास भएको योजना सम्पन्न पश्चात हलेसी मन्दिर परिसर हिलो र धुलो मुक्त हुने मेयर राईको भनाइ छ । हलेसी नजिकै रहेको पर्यटकीय स्थल रक गार्डेनमा जाने सडकसमेत उक्त योजनाले ढलान भएपछि पर्यटकहरुलाई सहज हुने नगरपालिकाले विश्वास लिएको छ ।