शिक्षकहरुले भदौ मसान्त भित्र सम्पत्ति विवरण बुझाउन समन्वय इकाई ओखलढुंगाको आग्रह

भदौ २२, सोलुखुम्बु । शिक्षा विकास तथा समन्वय इकाई ओखलढुंगाले समयमै सम्पती विवरण बुझाउन शिक्षकहरुलाई आग्रह गरेको छ । कार्यालयले एक सूचना जारी गर्दै सम्पती विवरण बुझाउन छुटेका जिल्लाका शिक्षकहरुलाई यस्तो आग्रह गरेको हो ।

शिक्षा विकास तथा समन्वय इकाई ओखलढुंगामा विगत ३ वर्षदेखि सम्पती विवरण बुझाउन बाँकी रहेका शिक्षकहरुको विवरण सार्वजानिक गर्दै भदौ मसान्तसम्म सम्पती विवरण बुझाउन अनुरोध गरेको छ । आर्थिक वर्ष २०७७-७८ मा ३३ जना, २०७८-७९ मा ११ जना र २०७९-०८० मा १३ जना शिक्षकले सम्पती विवरण बुझाउन बाँकी रहेको इकाई प्रमुख भरतबहादुर भट्टराईले जानकारी दिनुभयो ।

सम्पती विवरण बुझाउन बाँकी रहेका शिक्षकहरुले ५ हजार जरिवाना राजस्व र अख्तियार दुरुपयोग अनुसन्धानको आयोगको कार्यालयमा रकम जम्मा गर्न समेत आग्रह गरेको छ । शिक्षा विकास तथा समन्वय इकाई ओखलढुंगाअनुसार जिल्लामा हाल प्राथमिक तहमा करार र दरबन्दी गरी एक हजार ८०, निम्न माध्यमिक तहमा ३१४, मावि तहमा २८८ शिक्षक र ७३१ जना विद्यालय कर्मचारी रहेका छन् ।