हिमताल जोखिम न्यूनिकरणको उपाय खोज्न भन्दै काङ्ग्रेसले बुझायो सीडीयो पाण्डेलाई ज्ञापन पत्र 

भदौ २८, सोलुखुम्बु ।  नेपाली काङ्ग्रेस सोलुखुम्बुले हिमाली क्षेत्रमा विपद्जन्य घटनाको न्यूनिकरणका लागी हिमतालको जोखिम न्यूनिकरणको उपाय खोज्न जिल्ला प्रशासन कार्यालयलाई माग गरेको छ ।

गत साउन ३२ गतेको बाढीका कारण खुम्बु पासाङ ल्हामु गाउँपालिका वडा नम्बर ५ थामेमा आएको बाढीले थामे गाउँलाई पूर्ण रुपमा बगर बनाएको. भन्दै अन्य हिमताल फुट्न सक्ने जोखिम न्यूनिकरणको उपाय खोज्न भनेको हो । नेपाली काङ्ग्रेसका जिल्ला सभापति नाम्गेल जाङबु शेर्पाद्वारा हस्ताक्षरित विज्ञप्तिमा काङ्ग्रेसले थामे प्रभावितका लागी पहल गर्न जोडदार माग समेत गरेको छ । विज्ञप्ति मार्फतनै काङ्ग्रेसले हिमताल फुटेर आएको बाढीका कारण बगाएको पदमार्ग र भत्किएको जुभिङ पूल यथासिघ्र सञ्चालनमा ल्याउन पनि माग गरेको छ ।

जिल्ला प्रशासन कार्यालय सोलुखुम्बुका प्रमुख देवी पाण्डे खत्रीलाई ज्ञापन पत्र बुझाउँदै सोलुखुम्बु काङ्ग्रेसले सोलुखुम्बु जिल्ला भित्र भइरहेका निर्माणका कामहरू अलपत्र भएकाले यथाशीघ्र सञ्चालनमा ल्याउन पनि भनेको छ ।  ज्ञापनपत्र बुझाउन जिल्ला प्रशासन पुगेको टोलीले ज्ञापन पत्र बुझाउँदै थुलुङ दुधकोसी २ वात्तिम हुँदै खोटाङ जिल्ला जोड्ने पुल, थुलुङ दुधकोशी ५ र ५ लाई जोड्ने बर्खुघाट पुल, थुलुङ ७ र सोताङ जोड्ने दिप्लीघाट पुल अलपत्र रहेको भन्दै उक्त विकास निर्माणका कामहरुलाई अविलम्ब सुरु गर्न ज्ञापन पत्र मार्फत भनेको छ ।

यस्तै ज्ञापन पत्रमार्फत जिल्लामा दुधकोशी हाइड्रो पावर प्रालिले दुधकोशी २ ७० मेगावाटको पहुँचमार्ग निर्माण गर्ने क्रममा व्यक्तीको जग्गा र सिंहदेवी सामुदायिक वनमा पुयाएको क्षति को भोगाधिकार समेत नदिएकाले यस्तो कार्य गर्नेलाई कानुनी कारवाहीमा ल्याउन र जनताको सम्पत्तिको सुरक्षा गर्न पनि भनिएको छ । प्रमुख जिल्ल अधिकारी मार्फत सरकारलाई समन्वयका लागी ज्ञापन पत्र बुझाइएको महाधिवेशन प्रतिनिधि तथा तरुण दल  केन्द्रिय सदस्य नवीन थापाले जानकारी दिनुभयो ।  

नेपाली काङ्ग्रेसका केन्द्रिय सदस्य तथा पर्यटन विभाग प्रमुख आङगेलु शेर्पाको नेतृत्वमा गएको टोलीले चाडपर्वकोबेला हुन सक्ने कालो बजारी, अखाद्य बस्तुको बिक्रीवितरण लगायतलाई पनि अनुगमन गर्नका लागी माग राखिएको उहाँको भनाई छ । यस बाहेक पर्वका बेला यातायातका साधनमा हुने चर्को भाडा असुलीलाई पनि नियमन गरि नागरिकलाई ठगिनबाट जोगाउन तर्फपनि ध्यान दिन तर्फ ध्यानाकर्षण गराइएको थापाले बताउनुभयो ।  ।  शेर्पा नेतृत्वको टोलीमा नेपाली काङ्ग्रेस सोलुखुम्बुका जिल्ला सदस्य तथा महाधिवेशन प्रतिनिधि भातृ संघसंगठनका प्रमुख तथा प्रतिनिधि लगायत सम्मीलित थिए  ।