थुलुङ दुधकोशी स्वास्थ्य समीक्षा ः सबै स्वास्थ्य संस्थाको अंक ८० प्रतिशत बढी 

भदौ २८, सोलुखुम्बु ।  सोलुखुम्बुको थुलुङ दुधकोशी गाउँपालिकाले स्वास्थ्य संस्थाहरूको समीक्षा गरेको छ ।  गाउँपालिका अध्यक्ष असिम राईको अध्यक्षतामा सम्पन्न एक कार्यक्रमका बीच गाउँपालिकाका स्वास्थ्य संस्थाहरुको गत आर्थिक वर्ष २०८०/८१ को प्रगती, कामको समीक्षा भएको हो ।

भित्र रहेको दुधकोशी अस्पताल सहित ६ वटा स्वास्थ्य चौकी र ३ सामुदायिक इकाइले पालिकाबाट स्वीकृत भएका कामको प्रगतिको बारेमा पालिका अध्यक्ष राई, स्वास्थ्य शाखा प्रमुखलाई जानकारी गराएका थिए ।  समिक्षाका क्रममा गत आर्थिक वर्षमा गाउँपालिकाले स्वास्थ्य संस्थाले तोकिएका  स्वास्थ्य मापदण्ड सूचकलाई ८० प्रतिशत भन्दा माथि कायम गर्न सफल भएको निष्कर्ष निकालिएको छ । गत आर्थिक वर्षको समीक्षाका क्रममा गाउँपालिकाका सबै स्वास्थ्य संस्थाहरूमा मातृ मृत्युदर शून्य, नव शिशु तथा बाल मृत्यु दर शून्य, पूर्ण खोप सुनिश्चितता भएको छ ।

यसै आधारले गाउँपालिकाको सम्पूर्ण स्वास्थ्य संस्थाहरूको न्यनतम सेवा मापदण्डसम्बन्धी इन्डेक्सको हकमा सम्पूर्ण स्वास्थ्य संस्थाले ८० प्रतिशतभन्दा माथि कायम गर्न सफल भएको छ । यसैवीच थुलुङ दुधकोशी गाउँपालिकाले ३ वटा स्वास्थ्य संस्थालाई नगद सहित पुरस्कृत गरेको छ ।

गत आर्थिक वर्षमा गाउँपालिकाको स्वास्थ्य क्षेत्रको समिक्ष्ाका क्रममा उत्कृष्ठ अङ्क ल्याउने गाउँपालिकाका ३ वटा स्वास्थ्य चौकीलाई नगद सहित पुरस्कृत गरिएको गाउँपालिका प्रवक्ता भोजराज कार्कीले बताउनुभयो । उहाँका अनुसार गाउँपालिकामा उत्कृष्ट हुनेमा स्वास्थ्य चौकी–पञ्चन, दोस्रो स्वास्थ्य चौकी–काँगेल र तेस्रो स्वास्थ्य चौकी–जुबुलाई कमशः रु. १५ हजार, रू. १० हजार र रु. ५ हजार नगद सहित प्रमाण पत्रले सम्मान गरिएको  हो ।