सरकारी कर्मचारी गोवा घुम्न गएपछि पूर्वाधार विकास कार्यालय गाइघाट रित्तै

भादौ २८, सोलुखुम्बु ।  भौतिक पूर्वाधार विकास मन्त्रालय अन्तर्गत  उदयपुरमा रहेको पूर्वाधार विकास कार्यालयका कर्मचारी कार्यालयनै बन्द गरेर भ्रमणमा निस्किएका छन । गत भदौ २५ गते कार्यालयमा हाजिर गरेर हिँडेका कर्मचारी ४ दिन सम्म कार्यालय बन्द रहँदा पनि फर्किएका छैनन्  । कार्यालयमा कार्यरत रहेका ९ जना कर्मचारी कार्यालयको ढोकामा ताला लगाएर एकैपटक घुम्नका लागी भारतको गोवा सहर पुगेका हुन ।  

कर्मचारी घुम्न हिँडेपछि सेवाग्राही भने मर्कामा परेका छन्  । कर्मचारी कार्यालयमा नभएपछि सेवा लिनका लागी पुग्ने सेवाग्राहीले सिधै मुख्यमन्त्री कार्यालय विराटनगरमा फोन गरेर मुख्यमन्त्री गुहार्नुपर्ने अवस्था श्रीजना भएको छ ।   कार्यालय प्रमुख ललित कुमार चौधरी मन्त्रालयको कामले विराटनगरमा गएका बेला नौ जना स्थायी र ज्यालादारी कर्मचारीहरू एकसाथ बिदाको निवेदन लेखेर कार्यालयको टेबलमा छोडेर घुमघाम गर्न हिँडेको पाइएको छ ।

यसरी बिदा स्वीकृत नै नगरी गोवा भ्रमणमा जानेहरूमा आठौँ तहका इन्जिनियर मनोजकुमार ठाकुर, छैटौँ तहका इन्जिनियर रिपुमर्दन खड्का, प्रशासनका नवराज गिरी, सब इन्जिनियरहरू ईश्वर पुरी, किरण विष्ट, यादव प्रसाद वाग्ले रहेका छन् । त्यस्तै अर्का इन्जिनियर प्रजन गौतम, सोसल मोबिलाइजर विवेकानन्द झा र कार्यालय सहयोगी मनोज दनुवार पनि बिदा स्वीकृत नगरी बिदा बसेका हुन् । उनीहरूले असोज ६ गते कार्यालयमा हाजिर हुने आन्तरिक रूपमा भनेका छन् ।

कार्यालयमा स्थायी दरबन्दीका प्राय सबै कर्मचारीहरू बिदामा बसेपछि करारका केही कर्मचारीमात्र कार्यालयमा आउने गरेका छन् । उदयपुर र खोटाङ जिल्लाका विकासे काम हेर्न उक्त कार्यालयमा कर्मचारीहरू नभएपछि सेवाग्राहीहरूले मारमा परेको गुनासो गरेका छन् । सेवाग्राहीहरूले कार्यालयमा कर्मचारी नभएको भन्दै विराटनगर स्थित मुख्यमन्त्रीको कार्यालयमा उजुरी समेत हालेका छन् । कार्यालय प्रमुख चौधरीले आफू मन्त्रालयको कामले विराटनगरमा रहेकाले धेरै कुरा थाहा नभएको बताए ।