हलेसी तुवाचुङ ः ८३ दशमलव ५४ प्रतिशत बजेट खर्च

भदौ ३०, सोलुखुम्बु । खोटाङको हलेसी तुवाचुङ नगरपालिकाले आर्थिक वर्ष २०८०÷०८१ को विनियोजित बजेट मध्ये ८३ प्रतिशत बढी खर्च गरेको छ । शुक्रबार नगरपालिकामा वर्ष भरी सञ्चालन भएका योजना तथा कार्यक्रम र आय–व्ययको सार्वजनिक सुनुवाइ गर्ने क्रममा ७० करोड ५७ लाख २४ हजार ५८ रुपैयाँ बजेट मध्ये को ८० दशमलव ५४ प्रतिशत खर्च भएको वार्षिक सार्वजनिक सुनुवाइ प्रतिवेदनमा उल्लेख गरिएको छ ।

यस्तै, नगरपालिकाले आर्थिक वर्ष ०८०÷८१ मा रु १ करोड ५० लाख ९४ हजार ९ सय ३० रुपैयाँ राजश्व संकलन गरेको जनाएको छ । सुशासन र पारदर्शिताको लागि हलेसी तुवाचुङ नगरपालिकाले हरेक अर्ध वार्षिक र वार्षिकरुपमा सार्वजनिक सुनुवाइ गर्दै आएको छ । आगामी दिनमा अझ चार चार महिनाको अन्तरमा नगरपालिमा भइरहेको कामहरुको विषयमा सार्वजनिक सुनुवाइ गर्ने मेयर विमला राईले बताउनुभएको छ ।

नगरपालिकामा भएको सार्वजनिक सुनुवाइ एवं एसईईमा उत्कृष्ट हुने विद्यार्थी र विद्यालयलाई पुरस्कार प्रदान कार्यक्रमको उद्घाटन जिल्ला समन्वय समितिका प्रमुख सन बहादुर राईले गर्नुभएको हो । सार्वजनिक सुनुवाइमा उपस्थित नागरिक, राजनीतिक दलका प्रमुख तथा प्रतिनिधि एवं सरोकारवाला निकायहरुले नगरपालिकाको बजेट तथा सेवा प्रवाहमा प्रश्न गर्नुका साथै सुझाव दिएका थिए । प्रश्नसँगसगै सम्बन्धित शाखा एवं जनप्रतिनिधिले त्यसको जवाफ दिएका छन् ।

कार्यक्रममा राजनीतिक दलकातर्फबाट नेपाली कांग्रेस नगर समिति सभापति चक्र कुमार राई, नेकपा एमाले नगर कमिटि अध्यक्ष डिल्ली चाम्लिङ, नेकपा माओवादी केन्द्र नगर कमिटि उपाध्यक्ष प्रदिप राई र नेकपा एकिकृत समाजवादी नगर कमिटि अध्यक्ष मकर राईले आफ्नो धारणासँगै सुझाव राख्नु भएको थियो । कार्यक्रमका प्रमुख अतिथि समन्व प्रमुख राईले हरेक निकाय पारदर्शी हुनु पर्ने भन्दै हलेसी तुवाचुङ नगरपालिकाले सार्वजनिक सुनुवाइ गर्नु महत्वपुर्ण रहेको बताउनुभयो ।