नगरको चौथो वडा कार्यालय भवनको रुपमा केरुङको वडा कार्यालय भवन शिलान्यास 

भदौ ३०, सोलुखुम्बु ।  सोलुखुम्बुको सोलुदुधकुण्ड नगरपालिका वडा नम्बर ८ केरुङको प्रशासनिक भवन बन्ने भएको छ । सोलुदुधकुण्ड नगरपालिका र जिल्ला समन्वय समिति सोलुखुम्बुको लागत साझेदारीमा बन्ने वडा प्रशासनिक भवनको आज सोलुदुधकुण्ड नगरपालिकाका मेयर नाम्गेल जाङबु शेर्पाले शिलान्यास गर्नुभएको हो । भ्याट बाहेक ९९ लाख १ हजार ५ सय ८५ रुपैयाँमा वडाको प्रशासनीक भवन निर्माण सम्पन्न गर्नेगरी ग्रीन तारा कन्स्ट्रक्सन प्रालिले सम्झौता गरिसकेको छ ।

उक्त बजेट मध्ये सोलुदुधकुण्ड नगरपालिकाले ४० प्रतिशत र जिल्ला समन्वय समिति सोलुखुम्बुले ६० प्रतिशत लागत साझेदारी गर्ने वडा अध्यक्ष पासाङ कटवालले जानकारी दिनुभयो ।

गत साउन ७ गते सम्झौता भएको प्रशासनिक भवन निर्माणको कार्य चालु आर्थिक वर्ष भित्रै सम्पन्न गरिसक्नुपर्ने छ । एक औपचारिक कार्यक्रमका वचि वडाको प्रशासनिक भवन शिलान्यास गर्दै सोलुदुधकुण्ड नगरपालिकाका मेयर नाम्गेल जाङबु शेर्पाले नगरपालिकाले नागरिकलाई सहज सेवा प्रवाहका लागी सुविधा सम्पन्न भवन निर्माणको लागी प्राथमिकता दिएर काम गरेको बताउनुभयो ।  उहाँले केरुङको विकासका लागी आफूले प्राथमिकता दिएको भन्दै यहाँको सर्वपक्षीय विकासलाई नगरपालिकाले सदैव केन्द्रमा राख्ने बताउनुभएको छ ।  उहाँले अन्य वडाको तुलनामा केरुङमा जनसङ्ख्या र भूगोल दुबै बढी भएकाले पनि नगरको प्राथमिकतामा केरुङ परेको बताउनुभयो । उहाँले नगरपालिकाले गरेका राम्रा कामको लिष्ट निकै लामो भएको भन्दे जनताकै सेवामा अहोरात्र खटिरहेको उल्लेख गर्नुभयो ।  वडाको प्रशासनीक भवन समयमै सम्पन्न गर्न निर्देशन दिँदै मेयर शेर्पाले गुणस्तरमा कुनै सम्झौता नगरि काम गर्न निर्देश गर्नुभयो ।

 यस्तै कार्यक्रममा बोल्दै सोलुदुधकुण्ड नगरपालिकाका उपमेयर गान्धिमाया तामाङले वडा कार्यालय भवन निर्माणका लागी जग्गा उपलब्ध गराउने आङ दोर्जी शेर्पालाई धन्यवाद व्यक्त गर्नुभयो ।

यस्तै कार्यक्रममा सोलुदुधकुण्डनगरपालिका वडा नम्बर ७ का अध्यक्ष सोनाम ग्याल्जेन शेर्पाले आफ्नो छिमेकी वडामा भवन निर्माण भइरहेको खुसी लागेको बताउनुभएको छ । उहाँले केरुङको विकासमा वडा कार्यालय भवन निर्माण एउटा ठुलो विकास सावित हुने बताउँदै जग्गादातालाई धन्यवाद व्यक्त गर्नुभयो ।

शिलान्यास कार्यक्रमका अध्यक्ष तथा वडा अध्यक्ष पासाङ कटुवालले वडा कार्यालय निर्माण गरि सहज सेवा प्रवाह गर्दै नागरिकको सेवालाई चुस्त दुरुस्त बनाउन वडा प्रशासनीक भवनले सहयोग गर्ने बताउनुभएको छ ।  उहाँले हाल सम्म पुरानो पञ्चायती व्यवस्थाको वडा कार्यालयको जीर्ण भवनबाट सेवा प्रवाह भइरहेको जानकारी गराउनुभयो ।  उहाँले भवन निर्माण सम्पन्न भइसकेपछि वडामा हुने सामान्य कार्यक्रमहरू गर्नका लागी पनि सुविधा सम्पन्न भवनमा सभाहल निर्माण हुने जानकारी गराउनुभयो । उहाँले अर्को स्थानीय सरकार प्रमुखका रुपमा जो आएपनि सेवा प्रवाहमा सहजता हुने विश्वास व्यक्त गर्नुभयो ।

यस्तै कार्यक्रममा बोल्दै ग्रीन तारा निर्माण कम्पनीका प्रोपाइटर आङकाजी शेर्पाले वडाको प्रशासनिक भवन निर्माण समयमै सम्पन्न गरिसकने प्रतिशद्धता जनाउनुभएको छ ।

वडाको प्रशासनिक भवन शिलान्यास कार्यक्रममा मेयर शेर्पा, उपमेयर तामाङ, ७ नम्बर वडा अध्यक्ष शेर्पा ८ का अध्यक्ष कटुवाल सहित वडाका अन्य जनप्रतिनिधी कर्मचारी, स्थानीय समाजसेवी लगायतको बाक्लो उपस्थीतिच रहेको थियो ।