साल्मे गाउँ नजिकै ठुलो पहिरो, खानेपानीको हाहाकार 

असोज १, सोलुखुम्बु ।  सोलुखुम्बुको सोलुदुधकुण्ड नगरपालिका वडा नम्बर ७ मा पर्ने साल्मे बस्ती नजिकैबाट पहिरो झर्दा खानेपनीको हाहाकार मच्चिएको छ ।  गएराती करिव ११ बजेको समयमा साल्मे गाउँबाट करिव ३ सय मिटर नजिकैको स्थानमा पहिरो झर्दा साल्मेबासीले प्रयोग गर्दै आएको खानापानीको मुहान पुरिदिँदा त्यहाँ खानेपानीको हाहाकार मच्चिएको हो ।

स्थानीय ३०/३२ घरले प्रयोग गर्दै आइरहेको खानेपानीको मुहान माथिबाट ठुलो पहिरो झर्दा खानेपानीको मुहान पुरीएपछि धारामा पानी बन्द भएको स्थानीय सरोज श्रेष्ठले बताउनुभयो । खानेपानीको मुहान पुरिएपछि अहिले यहाँका नागरिक नाली र नजिकै रहेको सोलुखोलाको पानी पिएर समस्याको समाधान गर्न बाध्य बनेका छन् ।  

पहिरो जान्छ भनेर सोचदै नसोचेको ठाउँमा पहिरो गएको भन्दै अहिले साल्मेबासी माथिबाट पहिरो झरेर गाउँ नै पुर्छ भन्ने त्रासले निदाउन नसकेको उनीहरूले बताएका छन् ।  ५० औँ वर्ष सम्म पहिरो नगएको स्थानमा एकैपटक यत्रो पहिरो जाँदा अव साल्मे बस्न सक्ने वातावरण नरहेको उनीहरूको भनाई छ ।  खानेपानीको ट्याङ्की सँगै साल्मे नजिकै रहेको एक मन्दिर पनि पहिरोको उच्च जोखिममा परेको छ ।  अपर सोलु हाइड्रो पावर २३ मेगावाटको पावर हाउसको सिधै माथिबाट पहिरो खस्न सुरु भएपछि हाइड्रोको केही संरचनामा समेत पुग्न सक्ने जोखिम रहेको हाइड्रोका प्रबन्धक सिरिस श्रेष्ठको भनाई छ ।  

पहिरोले साल्मेबासीको खानेपानीको मुहान पुरेपछि अन्यत्रबाट खानेपानीको आपुर्तिका लागी पहल गर्ने सोलुदुधकुण्ड नगरपालिका वडा नम्बर ७ का अध्यक्ष सोनाम ग्याल्जेन शेर्पाले बताउनुभयो । पहिरोको अनुगमन गर्दै उहाँले पहिरो निकै ठुलो रहेकाले सचेत रहन पनि स्थानीयलाई आग्रह गर्नुभएको छ ।  उहाँले खानेपानीको तत्काल व्यवस्थापन गर्नका लागी नगरपालिका र जिल्ला प्रशासन कार्यालय सँग समन्वय गरेको बताउनुभएको छ ।  वारिपारि दुवैतिरबाट पहिरोले घेरेकाले साल्मेबस्तीलाई स्थानान्तरण गर्नु अतिनै आवश्यक रहेको उहाँको भनाई छ ।