सोलुखुम्बुमा साहसिक खेल बन्जी जम्प आजदेखि सञ्चालनमा  

असोज ४, सोलुखुम्बु ।  हिमाली जिल्ला सोलुखुम्बुमा कोशी प्रदेशकै पहिलो साहसिक खेल बन्जी जम्प सुरु भएको छछ ।   एभरेष्ट रिकृयशनले निर्माण गरेको ४३ मिटर लामो बन्जी जम्प आजबाट विधिवत रुपमा सुरु भएको हो । रिकृयशनको १ करोड ५० लाख बढी लगानीमा सोलुखुम्बुको खुम्बूपासाङ ल्हामु गाउँपालिका वडा नम्बर ३ र ५ जोड्ने हिलारी ब्रिजमा निर्मित ऐतिहासिक बन्जी जम्प आजबाट सञ्चालनमा आएको रिकृयशनका अध्यक्ष छेपाल दोर्जि शेर्पाले बताउनुभयो ।

 साहसिक खेलहरूमा सबैभन्दा सुरक्षित सँगै उत्कृष्ट विकल्पको रुपमा समेत चिनिने बन्जी जम्प सोलुखुम्बुको पर्यटकीय क्षेत्र लार्चे दोभान ( हिलारी ब्रिजमा ) निर्माण सम्पन्न गरिएको थियो । समुन्द्री सतहबाट ३ हजार मिटर उचाइमा रहेको लार्चे दोभान स्थीत दूधकोशी माथिको पुलमा ४३ मिटर अग्लो बन्जी जम्प निर्माण गरिएको सञ्चालक समिति अध्यक्ष छेपाल दोर्जी शेर्पाले जानकारी दिनुभयो ।

सोलुखुम्बुमा आउने प्राय आन्तरिक तथा बाह्य पर्यटकहरूले हिमालको सुन्दरता तथा त्यसको उचाइको मात्रै आनन्द लिने गरेकोमा अव त्यसको विकल्पमा बन्जि जम्प समेत रहने भएकाले यसले पर्यटन क्षेत्रमा नयाँ आयाम थपेको उहाँको भनाई छ ।  सेप्टेम्बर १ तारिकबाटै सुरु गर्ने भनिएको बन्जी जम्प विविध कारणबीच सेप्टेम्बर २० बाट सुरु भएको उहाँको भनाई छ ।  

उहाँले भन्नुभयो “प्राय पर्यटकहरू यहाँ आउँदा हिमाल मात्रै हेर्नु पर्छ, अन्य एक्स्ट्रा एक्टिभिटिज छैनन्, स्काइ डाइभिङ महँगो पर्न जान्छ तर अव विकल्पको रुपमा बन्जी जम्प छ । लुक्ला झरेर नाम्चे जाँदा बाटैमा बन्जी जम्पको मजा लिन पाउनुहुन्छ ।”

यो बन्जी जम्प सगरमाथा आधार शिविर जाने बाटैमा भएकाले पनि ऐतिहासिक रहेको दावी अध्यक्ष शेर्पाको छ । अहिले बन्जी जम्प निर्माण गरिएको लार्चे दोभान प्रसिद्ध हलिउड फिल्म “एभरेष्ट” को छायांकन गरिएको स्थान समेत हो ।