सोलुखुम्बुको सदरमुकाममा चाडपर्व लक्षित बजार अनुगमनमा जोड

असोज १०, सोलुखुम्बु । सोलुखुम्बुको सदरमुकाम सल्लेरीमा चाडपर्व लक्षित बजार अनुगमनलाई जोड दिइएको छ । जिल्ला प्रशासन कार्यालय, सोलुदुधकुण्ड नगरपालिका, घरेलु तथा साना उद्योग कार्यालय र सोलुखुम्बु उद्योग वाणिज्य संघले बजार अनुगमनलाई जोड दिएका हुन् ।

बिहिवार जिल्ला प्रशासन कार्यालय देखि आबाडाँडा सम्मको १५ वटा पसलमा अनुगमन गरिएको हो । अनुगमन गरिएका पसलबाट खाद्यन्नका सामाग्री, पिय पदार्थ र कस्मेटिकका सामाग्री गरी करिब ८ हजार, ८ सय ५० रुपैँया बराबरको म्याद नाघेका सामाग्री फेला परेको प्रमुख जिल्ला अधिकारी देवि पाण्डे खत्रिले बताउनुभयो । चाडपर्वको समयमा कालोबजारी तथा म्याद गुज्रिएका खाद्यवस्तु बिक्री हुन सक्ने कुरालाई मध्यनजर राख्दै बजार अनुगमन गरिएको उहाँको भनाई छ ।

चाडपर्वका लागि जिल्लामा ल्याइने खाद्यान्न, तरकारी, मासुजन्यलगायतका उपभोग्यवस्तुहरुको सहज आपूर्ति सुनिश्चित गर्न, कृत्रिम अभाव हुन नदिन, मूल्यवृद्धि तथा कालोबजारी रोक्न र उपभोक्ता ठगिनबाट जोगाउन बजार अनुगमन प्रभावकारी बनाउनुपर्नेमा सरोकारवालाहरुले जोड दिएका छन् । जफत गरिएको सामाग्रीहरू भोलि नष्ट गरिने उहाँले बताउनु भएको छ ।

अनुगमनमा प्रमुख जिल्ला अधिकारी देवी पाण्डे खत्री, सहायक प्रमुख जिल्ला अधिकारी रुपेश विश्वकर्मा, जिल्ला प्रहरी कार्यालय सोलुखुम्बुको प्रहरी प्रमुख एवंम प्रहरी नायव उपरीक्ष द्धारीका प्रसाद घिमिरे, घरेलु तथा साना उद्योग कार्यालय प्रमुख नारयण प्रसाद खतिवडा, सोलुखुम्बु उद्योग वाणिज्य संघका अध्यक्ष रामलाल श्रेष्ठ लगायत विभिन्न संघ सस्थाका प्रतिनिधीहरुको समेत उपस्थिती रहेको थियो ।