बर्खेटारमा पहिरो,  वर्षात बाधक बन्दा पन्छाउन समस्या 

असोज ११, सोलुखुम्बु ।  बर्खेटारमा झरेको पहिरोले मध्यपहाडी राजमार्ग अवरुद्ध बनेको छ ।  निरन्तर वर्षातका कारण खोटाङको हलेसी तुवाचुङ नगरपालिका स्थित बर्खेटारमा पहिरो खस्दा खोटाङ र भोजपुरका लागी यात्रुहरू बाटैमा अलपत्र परेका हुन् ।

 दशैँका लागी घर आउने जाने यात्रुहरू पहिरोको कारणले विचमै अलपत्र पर्नुपरेको यात्रु सन्तोष पोखरेलले बताएका छन् ।  राजमार्गको करिव ४० मिटरमाथिबाट खसेको पहिरोले २० मिटर बढी सडक अवरुद्ध बनेको छ ।  

अवरुद्ध राजमार्ग खुलाउन जिल्ला प्रहरी कार्यालयबाट प्रहरी टोली सहित सडक विभाग र स्थानीय सरकार लागी परिरहेको जनाइएको छ ।  यद्यपि माटो र  ढुंगाको पहिरो भएकाले खुलाउनलाई केही समस्या भएको प्रहरीको भनाई छ । त्यससँगै भारी वर्षात भइरहेकाले पहिरो पन्छाउँदा थप पहिरो जाने सम्भावना भएकाले थप समस्या निम्तिरहेको जिल्ला प्रहरी कार्यालय खोटाङका सूचना अधिकारी बेनु कार्कीले बताउनुभयो ।

  राजमार्ग अवरुद्ध हुँदा दशैँका लागी घर जानका लागी गन्तव्य तर्फ हिँडेका यात्रु सहित सावरी साधन अलपत्र परेका हुन ।  केही दिन पानी पर्ने भनी मौसम पूर्वानुमान महाशाखाले जारी गरेको बुलेटिनमा केही दिन ठुलो पानी पर्ने सम्भावना रहेको बताइएको छ ।  यस्तो समयमा यात्रा गर्दा जोखीमपुर्ण हुने भएकाले सचेत रहन पनि सरोकारवालाको अनुरोध छ ।  महाशाखाले जारी गरेको बुलेटिनमा कोशी प्रदेशका खोटाङ सहित ११ वटा जिल्लामा अति भारी वर्षात हुने भन्दै सतर्कता अपनाउन आग्रह गरेको छ ।