अविरल वर्षातका कारण बाढी पहिरोको जोखिम बढेपछि दिक्तेल रूपाकोटका विद्यालय २ दिनलाई बन्द  

असोज १२, सोलुखुम्बु । खोटाङको दिक्तेल रूपाकोट मझुवागढी नगरपालिकाले सामुदायिक विद्यालयलाई २ दिन बिदा गर्ने निर्णय गरेको छ ।  अविरल वर्षातका कारणले नगरपालिका क्षेत्र भित्र ठुलो क्षति भइरहेको र अझै हुन सक्ने भन्दै नगरपालिकाले असोज १३ र १४ गते नगरपालिका भरिका सामुदायिक विद्यालयलाई बन्द गर्ने निर्णय गरेको हो ।

नगर प्रवक्ता तथा वडा नम्बर ५ का वडा अध्यक्ष दिनेश कुमार घिमिरेले एक सूचना जारी गर्दै नगरपालिका क्षेत्र भित्रका सामुदायिक विद्यालयका शिक्षक तथा विद्यार्थीलाई विद्यालय आवतजावत गर्न समस्या हुनुका साथै दुर्घटनाको जोखिम रहेकाले २ दिन विद्यालय बन्द गर्ने निर्णय भएको जानकारी दिनुभएको हो ।

देशभर ठुलो वर्षात भइरहेको र राष्ट्रिय विपद जोखिम न्यूनिकरण प्राधिकरणले पनि सचेत रहन भनेकाले उच्च सतर्कता अपनाउन पनि नगरपालिकाले आग्रह गरेको छ ।