घरमाथिबाट झरेको पहिरोमा परि सोलुखुम्बुमा ५ जनाको मृत्यु ( विवरण सहित… )

 असोज १३, सोलुखुम्बु । हिमाली जिल्ला सोलुखुम्बुमा बाढी पहिरोमा परेर ५ जनाको मृत्यु भएको छ । शनिबार अविरल वर्षापछि झरेको पहिरोले जिल्लामा ६ जनाको मृत्यु भएको छ भने १ जना घाइते भएका छन् । जिल्ला प्रहरी कार्यालय सोलुखुम्बुका अनुसार जिल्लाको सोलुदुधकुण्ड नगरपालिकाको वडा नम्बर ९ मा २ जनाको र १० मा ३ जनाको पहिरोमा परि ज्यान गएको हो । मृत्यु हुनेमा सोलुदुधकुण्ड नगरपालिका वडा नम्बर १० सैलुङकी ३३ वर्षीय कविता मगर र सोही स्थानकी २४ वर्षीय रुपु मगर रहेकी छन् । उनीहरू एकै परिवारका सदस्य रहेको पनि प्रहरीले जनाएको छ । घर माथिबाट झरेको पहिरोले घर भत्काउँदा भित्र भएका उनीहरूको पनि मृत्यु भएको थियो । यस्तै वडा नम्बर ९ गोरखानीमा पनि ३ जनाको मृत्यु भएको छ । गोरखानीको छेवार भन्ने स्थानमा माइती गएकी २३ वर्षीय ल्हमु शेर्पा, उनकै ७ महिने छोरी फुर्वा ल्होप्साङ शेर्पा र २९ वर्षीय रिना तामाङको मृत्यु भएको जिल्ला प्रहरी कार्यालय सोलुखुम्बुका प्रमुख द्वारिका प्रसाद घिमिरेले बताउनुभयो । पहिरोमा परेकी ६२ वर्षीय याङ्जी शेर्पाको भने टाउकोमा गम्भीर चोट लागेको छ ।