वर्षातले अधिकांस सडकखण्ड अवरुद्ध, आवतजावतमा समस्या, खुलाउने प्रयास जारी

असोज १३, सोलुखुम्बु ।   गत २ दिन सम्म निरन्तर परेको वर्षाले पूर्वी पहाडी जिल्लाहरूका सडक क्षतविक्षत बनेका छन् । स्थानीयर सरकारले दशैँ तिहारलगायतका चाडपर्वलाई लक्षित गर्दै मर्मत सम्भार गरेका सडक तथा बाटोहरू पछिल्लो वर्षातले समस्याग्रस्त बनेका छन् ।  

सोलुखुम्बुको सोलुदुधकुण्ड नगरपालिका क्षेत्रभित्रका विभिन्न सडकखण्ड क्षतिग्रस्त बनेका छन् । बाढी पहिरोका कारणले नगरपालिकाको तिङ्ला, केरुङ लगायत वडाका सडकहरू बन्द भएका छन् ।  यता खोटाङको ऐसेलुखर्क गाउँपालिकाको क्षेत्रभित्रका करिव ६० प्रतिशत ग्रामीण सडकहरुमा बाढी पहिरोले क्षती पु¥याएको छ ।

केही हप्ता अघिसम्म परेको पानीले क्षतविक्षत बनाएका सडक खण्ड मर्मत गरिसकेर चाडपर्वका लागी आवतजावत तयारी अवस्थामा राखीएका सडक फेरी बाढी पहिरोले क्षतिग्रस्त बनेका हुन् ।  यता सोलुखुम्बुकै सोताङ गाउँपालिका र थुलुङ दूधकोशी गाउँपालिका जाने सडक पनि पहिरोबाट अवरुद्ध भएको प्रहरीले जनाएको छ ।

 अवरुद्ध सडक खुलाउनका लागी स्थानीय सरकार र प्रहरी सकृय रुपमा लागीपरिरहेको पनि जनाइएको छ । यता जिल्लाकै लिखुपिके गाउँपालिका जाने सडक खण्ड सल्लेरी लामाजुरा पनि गएरातीनै पहिरोबाट अवरुद्ध बनेको बताइएको छ ।  लिखुखोलाको कटानले उक्त सडक खण्ड अवरुद्ध बनेको हो । यसरी जिल्लाका विभिन्न स्थानीय तहका केन्द्र तथा जिल्ला सदरमुकामबाट स्थानीय तह र वडा जाने सडकखण्ड बाढी पहिरोका कारण अवरुद्ध बनिरहेको जनाइएको छ ।