दिप्रुङका शतप्रतिशत सडक पहिरोले अवरुद्ध, सोमबार सम्म खुलाउनेगरी काम सुरु 

असोज १३, सोलुखुम्बु ।  खोटाङको दिप्रुङ चुइचुम्मा गाउँपालिका ले २ दिन भित्र सबै अवरुद्ध सडक खुलाइसक्ने गरि काम थालेको छ ।  २ दिन सम्म निरन्तर परेको झरीले अवरुद्ध गाउँपालिकाका सबै मुख्य सडकहरू सोमबार सम्म खुलिसक्ने गरि काम सुरु भएको हो ।  गाउँपालिका अध्यक्ष लोकेन्द्र राईको निर्देशनमा अहिले सडक खुलाउने काम सुरु भइसकेको गाउँपालिकाले जनाएको छ ।

बर्षातले गाउँपालिकालाई जिल्ला सदरमुकाम दिक्तेलसँग जोड्ने याम्खा दिक्तेल सडकखण्ड, पंचमी-रेग्मीटार, पंचमी-लामीबगर रसुवा, पञ्चमी-खोटेहाङ सडक खण्ड सहित गाउँपालिकाको केन्द्रबाट सबै वडा कार्यालय ७ वटै सहित स्वास्थ्य संस्था जाने सडक बाढी पहिरोका कारण अवरुद्ध बनेका छन् ।

 यि सबै सडक २ दिन भित्र खुलाउने गरि काम सुरु भएको गाउँपालिका अध्यक्ष लोकेन्द्र राईले जानकारी दिनुभयो ।  प्राविधक टोली खटाएर मेसिन सहित टोली फिल्डमा पुगेर काम सुरु गरिसकेको उहाँको भनाई छ ।