पहिरोबाट मृत्यु भएका ५ परिवारलाई ५० हजार राहत, नगरपालिकाले ३ लाख दिने घोषणा 

असोज १३, सोलुखुम्बु ।  पहिरोमा परी मृत्युबरण गरेका ५ परिवारका सदस्यलाई राहत वितरण गरिएको छ ।    शनिबार पहिरोमा परि ज्यान गुमाएका ५ परिवारका सदस्यलाई आइतबार जिल्ला विपद व्यवस्थापन समिति र नगरपालिकाले घटना स्थल पुगेर राहत वितरण गरेको हो । जिल्लाको सोलुदुधकुण्ड नगरपालिका वडा नम्बर ९ गोराखानीका ३ र वडा नम्बर १० टाप्टीङका २ परिवारलाई आइतबार राहत वितरण गरिएको हो ।

 पहिरोमा परि जनधनको क्षति व्यहोरेका परिवारलाई विपद व्यवस्थापन समितिका संयोजक देवी पाण्डे खत्री, नगरपालिकाका प्रमुख नाम्गेल जाङ्बु शेर्पा तथा जिल्ला प्रहरी कार्यालय सोलुखुम्बुका डीएसपी द्वारीका प्रसाद घिमिरेले घटना स्थल पुगेर राहत वितरण गर्नुभएको हो । शनिबार पहिरोमा परि  टाप्टीङका कविता मगर र रुपु मगर त्यसैगरी गोराखानीका ल्हमु शेर्पा र उनकी ७ महिने छोरी फुर्वा ल्होप्साङ र रिना तामाङको मृत्यु भएको थियो ।

 विपद व्यवस्थापन समिति तथा नगरपालिकाको टोली घटनास्थल पुगेर राहत मृतक परिवारलाई ५० हजार रुपैयाँ नगद सहित त्रिपाल लगायत अन्य खाद्य सामाग्री राहत स्वरुप वितरण गरेको नगर प्रवक्ता फुर्वा ग्याल्जेन शेर्पाले बताउनुभयो । 

यसैवीच घटना स्थलमै पुगेर राहत रकम वितरणा गर्नेक्रममा नगरप्रमुख शेर्पा र उपप्रमुख गान्धीमाया तामाङले मृतककाे परिवारलाई ३ लाख रुपैयाँ राहत रकम उपलब्ध गराउने घोषणा गर्नुभएको छ । 

पहिरोबाट घाइते एक जनाको टाप्टीङ स्थित वाङछु मेमोरीयल अस्पतालमा उपचार भइरहेको छ भने मृतकहरुको पोस्टमार्टम पनि सोही अस्पतालमा गरिएको थियो ।