नेल बजारमा चाडपर्व लक्षित बजार अनुगमन : ३३ हजार बढीको अखाद्य वस्तु जफत

असोज १५, सोलुखुम्बु । सोलुखुम्बुको थुलुङ दुधकोशी गाउँपालिका वडा नम्बर १ स्थित नेले बजार अनुगमन गरिएको छ । मंगलबार जिल्ला प्रशासन कार्यालय, थुलुङ दुधकोशी गाउँपालका र वडा कार्यालयको सक्रियतामा चाडपर्व लक्षित बजार अनुगमन गरिएको हो ।

१४ वटा होटल पसलमा अनुगमन गर्दा ३३ हजार ५ सय बढिको अखाद्य बस्तु जफत गरिएको छ । अनुगमनको क्रममा ठुला पसल भन्दा साना–साना पसलमा सबैभन्दा बढी अखाद्य बस्तु बरामद गरिएको थुलुङ दुधकोशी गाउँपालिका वडा नम्बर १ का वडा अध्यक्ष घनराज सुनुवारले जानकारी दिनुभयो ।

बजार अनुगमनमा जफत गरिएका सामाग्रीलाई नष्ट गरिसकिएको उहाँको भनाई छ । बजार अनुगमनमा जिल्ला प्रशासनका नायव सुब्बा सुमन कार्की, थुलुङ दुधकोशी गाउँपालिका प्रमुख प्रशासकिय अधिकृत प्रशन्नदिप राई लगायतको उपस्थिती रहेको थियो ।