थुलुङ दुधकोशीमा ३४ जना इन्जिनियर उत्पादन, पहिलो व्याजका ९७ प्रतिशत विद्यार्थी उत्तीर्ण 

सोलुखुम्बु, बैशाख २४ । सोलुखुम्बुको थुलुङ दुधकोसी गाउँपालिका स्थित थुलुङ दूधकोशी बहुप्राविधिक शिक्षालयबाट ९७ प्रतिशत विद्यार्थी उत्तीर्ण भएका छन ।  शैक्षिक सत्र २०७७ मा डिप्लोमा इन सिभिल इन्जिनियरिङ विषय अध्ययनका लागी शिक्षालयमा भर्ना भएका ३५ जना विद्यार्थीहरू मध्ये ३४ जना अर्थात ९७ दशमलव १४ प्रतिशत विद्यार्थीहरूले छैटौँ सेमेस्टर उत्तीर्ण गर्दै इन्जिनियर बन्न सफल भएका हुन ।

२०७७ सालमा स्थापना भएको यस शिक्षालयले सेमेस्टर परीक्षाहरूमा समेत उत्कृष्ट नतिजा हात पार्दै आएको थियो । विद्यार्थीहरू इन्जिनियर बन्नका लागी ठूला सहर र विदेश जाने परिपाटि बनेको बेला आफ्नै ठाउँमा कलेज स्थापना गरेर पठन पाठन सुरु गरेकोमा अहिले आएको सकारात्मक नतिजा गाउँपालिकाकै गर्वको विषय बनेको थुलुङ दूधकोशी गाउँपालिकाका अध्यक्ष असिम राई बताउनुहुन्छ ।  

राम्रो नतिजा ल्याउन ठूला सहर र विदेशमै जानुपर्छ भन्ने मान्यता लाई चिर्न यो नतिजा प्रभावकारी रहेको उहाँको भनाई छ ।  थुलुङ दूधकोशी बहुप्राविधिक शिक्षालयमा अहिले ५३ जना विद्यार्थी डिप्लोमा इन सिभिल इन्जिनियरिङ अध्ययन गरिरहेको गाउँपालिकाका प्रवक्ता भोजराज कार्कीले जानकारी दिनुभयो ।