२ दिन देखि लुक्लामा उडान प्रभावित, पिक सिजनमा मौसम विग्रिए पछि खुम्बुमा पर्यटक आउन सकेनन्

असोज २५, सोलुखुम्बु । शरद ऋतुको मध्य सिजनमा मौसम विग्रिए पछि खुम्बु क्षेत्रमा पर्यटक भित्रिन सकेका छैनन् । पर्यटक खुम्बु आउने एक मात्र विकल्प हवाई मार्ग भएको र मौसमि विमानस्थल भएका कारण पर्यटकहरु सगरमाथा क्षेत्र आउन नसकेका हुन् ।

विहीबार पनि कुनै हवाई जहाँज अवतरण नगरेको लुक्ला विमास्थलमा शुक्रबार पनि विहानै देखि मौसम प्रतिकुल हुँदा एउटा पनि उडान हुन सकेको छैन । दैनिक ४० भन्दा माथि उडान रद्ध हुँदा दिनको ९ सय भन्दा बढी पर्यटक खुम्बु आउन बन्चित भएका छन् । विहानै बाट विमानस्थल प्रवेश मार्ग बादलले ड्याम्मै ढाकेको तेन्जिङ हिलारी विमानस्थल लुक्लाका प्रमुख उमेश पन्थिले जानकारी दिए ।

उनका अनुसार हिजो पनि विभिन्न विमान कम्पनीहरुले मौसम खराबीकै कारण ४५ भन्दा बढी उडान रद्ध गर्नु बाध्य भएका थिए । यो साताका शूरुमा एकै दिन ५३ वटा सम्म उडान हुँदा दैनिक १ हजारसम्म पर्यटक भित्रिए पछि उत्साहित बनेको सगरमाथा क्षेत्रको पर्यटन हिजो र आजको मौसमका कारण निराशामा परिणत भएको छ ।

अहिले रामेछापको मन्थलीबाट तीन वटा विमान कम्पनीहरुले ३० वटा भन्दा बढी उडान गर्छन भने काठमाण्डौ विमानस्थलबाट औशत दैनिक १० वटा उडान गरेको छ । मौसमकै कारण विमान अवतरण गराउन सक्ने अवस्था नरहेको विमानस्थल प्रमुख उमेश पन्थिले बताए । बुधबार पनि मौसम खराबीका कारण १० वटा मात्रै उडान भएको थियो ।

अहिले तारा, समिट र सिता एयरले रामेछाप र काठमाण्डौबाट लुक्लाका लागि उडान गर्दै आएका छिन् । अहिले १२ वटा हेलिप्टरले दैनिक २ सयको संख्यामा मात्रै पर्यटकहरु ल्याईरहेका छन् । बाढी पहिरोका कारण सडक र पुलहरु विग्रिएका कारण पर्यटकहरु स्थलमार्ग प्रयोग गरेर खुम्बु जान सक्ने अवस्था छैन ।