तीन महिनामा सगरमाथा घुम्न आए ८ हजार बढी पर्यटक, ७ हजार बढी विदेशी

असोज २५, सोलुखुम्बु । सगरमाथा राष्ट्रिय निकुञ्ज भ्रमणका लागी यस वर्षको हाल सम्म ८ हजार बढीले अनुमती लिएका छन् । हिमाली जिल्ला सोलुखुम्बुमा रहेको निकुञ्ज क्षेत्र भित्र रहेका पर्यटकीय र मनोरम दृष्य अवलोकनका लागी ६ हजार विदेशी पर्यटकले मात्रै अनुमती लिएका हुन ।

सगरमाथा राष्ट्रिय निकुञ्ज कार्यालयका अनुसार सगरमाथा राष्ट्रिय निकुञ्ज भ्रमणका लागी ६ हजार २ सय ५१ जना विदेशी सहित ८ सय ८६ सार्क राष्ट्रका पर्यटकले अनुमती लिएका हुन । असोज महिनाको हाल सम्मको तथ्याङ्क अनुसार उक्त संख्याका विदेशी सहित करिव ९ सय जना नेपालीले भ्रमण अनुमती लिएका छन् ।

आर्थिक वर्षको हाल सम्म सार्क, विदेशी र नेपाली गरि कुल ८ हजार १६ पर्यटकले सगरमाथा क्षेत्रमा भ्रमण अवलोकनको अनुमती लिएको राष्ट्रिय निकुञ्ज कार्यालयसँग तथ्याङ्क छ ।

यसरी भ्रमणमा आएका विदेशी पर्यटकहरुबाट मात्रै २ करोड ८२ हजार राजस्व संकलन भएको छ । निकुञ्ज कार्यालयका अनुुसार विदेशी पर्यटकहरुबाट १ करोड ८७ लाख ५३ हजार र सार्क राष्ट्रका पर्यटकहरुबाट १३ लाख २९ हजार रुपैयाँ राजस्व संकलन भएको हो । नेपाली बाट भने ९७ हजार ९ सय रुपैयाँ राजस्व संकलन भएको कार्यालयले जनाएको छ ।

शरद ऋतुको पर्यटकीय सिजनमा सगरमाथा क्षेत्र घुम्नका लागी हवाइमार्गबाट मात्रै दैनिक १ हजार देखी १२ सय पर्यटक लुक्ला आईपुगेका छन् ।