हिं‍सा रहित दशैँ मनाउन जिल्ला प्रहरी कार्यालय सोलुखुम्बुको आग्रह

असोज २६, सोलुखुम्बु । हिं‍सा रहित दशैँ मनाउन जिल्ला प्रहरी कार्यालय सोलुखुम्बुले आग्रह गरेको छ । हिन्दुहरुको विषेश पर्व दशैँका समयमा अप्रीय घटना घट्न सक्ने भन्दै सबैलाई सतर्क रहेर हिँसा रहित दशैँ मनाउन प्रहरीले जिल्ला बासीलाई आग्रह गरेको हो ।

आफ्नो ईच्छा र स्वार्थ पुरा गर्ने बहानामा समाजमा अरुको अधिकार हनन, शान्ति सुरक्षामा विचलन, आफन्त र छिमेकीमा झै झगडा लगाएका घटना हुनसक्ने भएकाले यस्तो नगर्न आग्रह गरिएको जिल्ला प्रहरी कार्यालय सोलुखुम्बुका प्रहरी प्रमुख एवंम प्रहरी नायव उपरीक्षक द्धारिका प्रसाद घिमिरेले बताउनुभयो ।

उहाँले पर्वका बेला रमाईलो गर्ने बहानामा मदिरा सेवन र जुवातास खेल्ने प्रवित्ती बढ्ने गरेको भन्दै त्यसो नगर्न र कसैले गरेको पाईएमा कानुनी कारबाही गर्ने उल्लेख गर्नुभयो । यस्तै दशै लक्षित सुरक्षा व्यवस्था पनि कडा बनाईएको जिल्ला प्रहरी कार्यालय सोलुखुम्बुले जनाएको छ । पर्वको समयमा हुन सक्ने अप्रीय घटनालाई लक्षित गरी जिल्लाभर सुरक्षा व्यवस्था कडा बनाईएको हो ।

जिल्लामा शान्ति सुरक्षाको अवस्था सामान्य रहेको भएपनि हुन सक्ने घटनालाई मध्ये नजरगर्दै सुरक्षा व्यवस्था कडा बनाईएको बताउनुभयो । निर्धक्क भएर पर्व मनाउने गरी नागरिकलाई सुरक्षा दिने गरी जिल्ला प्रहरी कार्यालय र मातहतका प्रहरी खटाइएको जनाईएको छ ।