दशै विदामा पनि धमाधम बन्दै नेचासल्यानको प्रशासनिक भवन 

असोज ३०, सोलुखुम्बु । सोलुखुम्बुको नेचासल्यान गाउँपालिकाको प्रशासकीय भवन निर्माण दशैँ विदामा पनि निर्वाध रुपमा भइरहेको छ ।  प्रशासकीय भवन निर्माणका लागी नेचासल्यान गाउँपालिकाले भुक्तानी र सहजिकरणमा कुनै ढिलाइ नगरेपछि प्रशासकीय भवन निर्माणको काम निरन्तर अगाढी बढिरहेको हो । गत बैशाख मा सम्झौता गरि काम जेठ १६ बाट सुरु गरेको निर्माण कम्पनी आरोन ओम बालाजी इ आर रामेछापले ४ महिनामै ८० प्रतिशत बढी काम सक्काएको हो ।  

नेचासल्यान गाउँपालिकाको ४० प्रतिशत र संघ सरकारको ६० प्रतिशत बजेटको लागत साझेदारीमा निर्माणको काम भइरहेको प्रशासकीय भवनको वित्तिय प्रगति मात्रै ६६ प्रतिशत भएको निर्माण कम्पनीले जनाएको छ ।  भवन निर्माणकार्यलाई तिब्र रुपमा अगाढी बढाइएको गाउँपालिकाले आगामी पौष भित्रमा भवन निर्माण सम्पन्न हुनेमा ढुक्क रहेको गाउँपालिका अध्यक्ष धनजन राईले बताउनुभयो ।  उहाँले बजेट अभाव हुन नदिने भन्दै जसरी पनि समयमा भवन निर्माण सम्पन्न गराई नागरिकलाई सेवा प्रवाह गर्ने जिकिर गर्नुभएको छ ।  

उहाँले गाउँपालिकालाई प्रशासकीय भवन अत्यन्त आवश्यक रहेका भन्दे दशैँ बिदा समेत नभनी काम भइरहेको पनि बताउनुभयो ।  निर्माण कम्पनीका म्यानेजिङ डाइरेक्टर विजय सुनारका अनुसार पौष भित्रमा भवन निर्माण सम्पन्न गरि पालिकालाई हस्तान्तरण गर्ने लक्ष छ ।  ५ तले सुविधा सम्पन्न प्रशासनिक भवन निर्माण भएपछि गाउँपालिका बासीलाई प्रशासनिक सेवा प्रवाहमा थप सहजता हुने गाउँपालिका उपाध्यक्ष विना राईको भनाई छ ।