मन्थलीमा अड्कीएका पर्यटकको व्यवस्थापनमा कठिनाइ ः टान द्वितीय उपाध्यक्ष शेर्पा 

कार्तिक १, सोलुखुम्बु । मौसमको खराबीका कारण मन्थली विमानस्थलमा अड्कीएका पर्यटकको व्यवस्थापनमा कठिनाइ भइरहेको छ । सगरमाथा क्षेत्र घुम्नका लागी देश छोडेर आएका विदेशी पर्यटकहरू गन्तव्यमा पुग्न नपाउँदै उडान अवरुद्ध हुँदा उनीहरूको व्यवस्थापनमा कठिनाइ भएको हो ।  काठमाण्डौबाट मन्थली आएर लुक्ला आउने पर्यटकहरू मौसम नखुल्दा रामेछापको मन्थलीमा अलपत्र परिरहेको ट्रेकिङ एजेन्सी एसोसियसन अफ नेपाल (टान) का द्वितीय उपाध्यक्ष सनम शेर्पाले बताउनुभयो ।  

हवाई उडान अवरुद्ध हुँदा पर्यटकहरूलाई खाना तथा बासको समेत सुविधा नभएकाले केही पर्यटकहरू काठमाण्डौनै फर्किएको उहाँको भनाई छ । लुक्ला घुम्न आउका विदेशी पर्यटक, उनीहरूका गाइड तथा भरियाहरु गरि करिव ७ सय बढी पर्यटकहरू मन्थलीमा अझैसम्म पनि फसिरहेको उहाँले उल्लेख गर्नुभयो ।  

नेपाली अर्थतन्त्रमा राम्रो योगदान गर्ने पर्यटन क्षेत्रमा हवाई उडानमा मात्रै भरोसा गर्दा यसले समस्या भएको उहाँले बताउनुभयो । खुम्बु क्षेत्र जान यातायातको सुविधा नहुँदा हवाई उडाननै पहिलो र अन्तिम विकल्प भएपनि घुम्नकै लागी एका पर्यटक गन्तव्य सम्म नपुग्दा पर्यटन व्यवसायी, होटल व्यवसायी लगायत मारमा परेको उहाँको भनाई छ ।  पर्यटकहरूलाई लुक्ला ल्याउन यथासम्भव प्रयास भइरहेको र सेनाको हेलिकप्टर प्रयोग गर्ने विषयमा पनि छलफल भइरहेको उहाँले बताउनुभयो ।