सोलुखुम्बुमा पाक्न थाल्यो धान, किसानलाई धान भित्र्याउन माैसमकाे चिन्ता

कार्तिक ५, सोलुखुम्बु । हिमाली जिल्ला सोलुखुम्बुमा धान काट्न सुरु भएको छ ।  जिल्लामा गत जेठ/असारमा रोपिएको धान अहिले काट्ने काम सुरु भएको हो । जिल्लाको खुम्बु पासाङ ल्हामु गाउँपालिका बाहेक अन्य सबै पालिकाहरूमा धान खेती हुने गरेको छ ।  जेठ मध्येतिर रोपिएको धान तिहार अगावै काट्न तयारी हुने भएकाले जिल्लाको सोलुदुधकुण्ड नगरपालिका वडा नम्बर ११ तिङ्लाका किसानले काट्न थालेका छन् । 

सामान्यतया जिल्लामा धान काट्ने सिजन कार्तिक पहिलो हप्ता देखी मंसिर अन्तिम सम्मलाई मानिन्छ । हिमाली क्षेत्रमा छिट्टै धान रोपिने भएकाले काट्ने समय पनि अन्य भु-भागहरुभन्दा केही छिटो हुने कृषि ज्ञान केन्द्र सोलुखुम्बुले जनाएको छ । यो पटक गत असोज १० देखी १३ गते सम्मको पानीले धान उतपादन घटाउन सक्ने कृषि ज्ञान केन्द्र सोलुखुम्बुले जनाएको छ ।  

अविरल वर्षाले धान रोपाई हुने खेतहरूमा क्षति गराउँदा, फल्दै गरेको धान झरिदिँदा उत्पादन घट्न सक्ने आँकलन गरिएको कृषि ज्ञान केन्द्र सोलुखुम्बुका प्रमुख दुर्गा बहादुर तिरुवाले बताउनुभयो ।  यस वर्ष सोलुखुम्बुमा १ हजार २ सय २५ हेक्टर क्षेत्रफलमा धान रोपाइ भएको थियो ।  जुन प्रदेश नम्बर १ कै सबैभन्दा कम हो ।  

उता पहाडी जिल्ला खोटाङमा भने ८० प्रतिशत धान पाकेको छ भने अव २० प्रतिशत पाक्न बाँकी छ  ।  जिल्लामा तिहार पछि मात्रै धान काट्न सुरु हुने कृषि ज्ञान केन्द्र खोटाङका प्रमुख हरिनारायण राईले बताउनुभयो । उहाँका अनुसार अहिले धान पुरै पाक्न बाँकी रहेकाले अझै केही समय पर्खनुपर्ने छ ।