खुम्बु क्षेत्रलाई जोड्ने छिर्दिघाट पुल निर्माण अन्तिम चरणमा, १ महिना भित्र कामसक्न मेयर शेर्पाको निर्देशन 

कार्तिक ६, साेलुखुम्बु ।  सोलुखुम्बुको सोलुदुधकुण्ड नगरपालिका र माप्य दुधकोशी गाउँपालिका जोड्ने छिर्दिघाट मोटरेवल पूल  १ महिना भित्र निर्माण सम्पन्न गर्न सोलुदुधकुण्ड नगरपालिकाले जोड दिएको छ ।  सोमबार पुलको निरीक्षणमा पुग्नुभएका नेपाली काङ्ग्रेस सोलुखुम्बुका सभापति तथा नगरपालिकाका मेयर नाम्गेल जाङ्बु शेर्पाले निरीक्षण गर्दै १ महिना भित्र काम सम्पन्न गरी सञ्चालनमा ल्याउने तवरले काम गर्न निर्माण कम्पनीलाई निर्देशन दिनुभएको छ । उहाँले निर्माणाधीन छिर्दिघाट पुल खुम्बु क्षेत्रको पर्यटन प्रवर्द्धनका लागी अत्यन्तै महत्वपूर्ण पुल भएकाले यसको निर्माणका लागी नगरपालिकाले प्राथमिकताका साथ काम गरिरहेको उल्लेख गर्नुभएको छ ।  

पल निर्माण भइसक्दा सम्म अस्थाई रुपमा गाडी तार्नका लागी खोला फिँजारेर समस्याको समाधान गर्ने योजना रहेको मेयर शेर्पाले  सुनाउनुभयो । छोटो समयको भिसा हानेर खुम्बु क्षेत्रलाई गन्तव्य बनाउँदै घुम्न नेपाल आएका पर्यटक मौसम प्रतिकुल हुँदा उडान नभएर विमानस्थलमा अलपत्र पर्नुपर्ने बाध्यताको विकल्पका लागी सल्लेरी छिर्दिघाट थामडाँडा सडक उपयुक्त विकल्प भएकाले यसलाई नगरपालिकाले उच्च प्राथमिकतामा राखेको हो ।  

पुल निर्माण कर्ता ठेकेदार कम्पनीले पनि निर्माणको कामलाई निर्वाध रुपमा अगाढी बढाइरहेको जनाएको छ ।  गत २०८० पुषमा ठेक्का सम्झौता गरि काम सुरु गरेको कम्पनीले आगामी १ महिना भित्र काम सक्ने गरी काम भइरहेको जनाएको छ ।  हाल ९६ प्रतिशत काम सम्पन्न भएको ठेकेदार कम्पनीको दावी छ ।  भ्याट सहित ७ करोड ६ लाखको लागतमा निर्माण भइरहेको ५० मिटर लम्बाइ र ११ मिटर चौडाइको मोटरेवल पुल समयअगावै काम सम्पन्न गर्न लागी परेको ठेकेदार कम्पनीका प्रतिनिधि टिकाराम परियारको भनाई छ ।