कार्तिक १३, सोलुखुम्बु । सोलुखुम्बुको खुम्बु पासाङ ल्हामु गाउँपालिकाले राष्ट्रिय प्रशारण लाइन तथा सवस्टेशन निर्माण परियोजना विस्तार गर्न नेपाल विद्युत प्राधिकरण केन्द्रिय कार्यालयलाई आग्रह गरेको छ ।
पर्यटकीय स्थानलाई व्यवस्थित र स्थानियहरुलाई सुविधा सम्पन्न बनाउनका लागि विधुत उर्जाको आवश्यकता भएको भन्दै यस्तो आग्रह गरेको हो । गाउँपालिकाले सगरमाथा क्षेत्र विश्वकै पर्वतारोहीहरुको रोजाईको गन्तव्य भएको र यसलाई व्यवस्थित बनाउन आवश्यक देखिएको खुम्बु पासाङ ल्हामु गाउँपालिकाका अध्यक्ष मिङमा छिरि शेर्पाले बताउनुभयो ।
पालिकाले कार्तिक ८ गते सूचना जारी गर्दै पर्यटकहरुको आगमनसँगै त्यस क्षेत्रमा पर्यटकीय लज तथा होटलहरु खुल्ने क्रम जारी भएकाले विद्युत जडान गर्न आवश्यक देखिएको उल्लेख गरिएको छ ।
यस्तै राष्ट्रिय निकुञ्जको वनजगंल तथा दाउरा कटानी कम गर्नका लागि स्थानीय स्तरमा साना लघु जलविधुतहरु उपलब्ध भएतापनि सो मार्फत सम्पूर्ण उर्जा व्यवसथापन गर्न असम्भव भएकाले चाडै राष्ट्रिय प्रशारण लाईनको परियोजना अघि बढाउन अनुरोध गरिएको पालिकाले जनाएको छ ।
खुम्बु पासाङ ल्हामु गाउँपालिका अन्तर्गत वडा नम्बर १ सम्म हाल विधुत प्रशारणको काम भैरहेको र बाकीँ वडाहरुमा राष्ट्रिय प्रशारण लाईन विस्तार कार्य बाँकी रहेको छ ।
कार्यालय सँग विभिन्न समयमा भएको छलफल अनुसार पालिकाको वडा नम्बर २ मुसेमा ३३ के.भि.ए कोे सबस्टेशन निमार्णका लागि स्थलगत अनुगमन पनि भइसकेको जानकारी गराउदै वडा नम्बर ५ नाम्चे सम्म ३३ के.भि.ए को राष्ट्रिय प्रशारण लाइन तथा सवस्टेशन निर्माणको लागि आवश्यक बजेट विनियोजन गरि परियोजना अगाडी बढाइदिन आग्रह गरिएको हो ।
परियोजनाको लागि स्थानीय सरकारले समन्वय सहकार्य र आवश्यक सहयोग गर्ने प्रतिबद्धता जनाइएको छ ।
Discussion about this post