खोटाङमा माइती जाने र फर्किने ३ सय बढी महिलालाई निःशुल्क मोटरसाइकल सेवा

कार्तिक २०, सोलुखुम्बु । खोटाङका युवाहरुले तिहारमा माइती जाने र फर्किने ३ सय बढी महिलालाई निःशुल्क मोटरसाइकल सेवा दिएका छन् । दसै–तिहार, चेलीलाई उपहार’ अभियान अन्तर्गत युवाहरुले ३ सय ४० जना चेलीहरुलाई नि ः शुल्क मोटरसाइकल सेवा दिएका हुन् ।

कार्तिक १६ गतेबाट सुरु गरेको अभियान कार्तिक १९ गते सम्पन्न गरिएको अभियानका संयोजक सञ्जयकुमार राईले जानकारी दिनुभयो । यातायात सेवा नपाएर समस्यामा परेका महिलालाई सम्बन्धित स्थानसम्म पु¥याइदिनका लागि युवा समूहले अभियान चलाएको संयोजक राईको भनाई छ ।

चाडबाडको बेला गाउँ–गाउँसम्म सवारी साधनको सहज पहुँच नहुनका साथै सवारी साधनले महङ्गो भाडा अलुल्नका साथै युवाहरूलाई सिर्जनात्मक काममा प्रेरित गर्न यो अभियान सञ्चालन गरिएको बताईएको छ । दसैँमा चार दिनसम्म सञ्चालन भएको अभियानबाट ७० जनाले सेवा पाएका थिए ।

“दसैँ, तिहार चेलीलाई उपहार” नाम दिएर सुरु भएको अभियानमा करिब १४ जना युवा जेडिएको जनाइएको छ । उक्त युवाहरुले दिक्तेल–ऐसेलुखर्क गाउँपालिका, दिक्तेल–दिप्रुङ चुइचुम्मा गाउँपालिका, दिक्तेल–साकेला गाउँपालिका लगायत जिल्लाका विभिन्न ठाउँमा ३५ किलोमिटर भित्रसम्म यो टिमले निःशुल्क सेवा दिइएको थियो ।

अभियान सफल बनाउनका लागि खोटाङ महिला उद्यमी सङ्घ, व्यवसायी आशिष थापा लगायत अन्य सङ्घ संस्था र ब्यक्तिहरुले महत्वपूर्ण सहयोग गरेका छन् ।