कोशी प्रदेशमा लगातार बिहिवार देखि आईतबार सम्म सार्वजनिक बिदा

कार्तिक २१, सोलुखुम्बु । कोशी प्रदेशमा लगातार ४ दिन सार्वजनिक बिदा परेको छ । भोलि बिहीबारदेखि आइतबारसम्म बिदा परेको हो । मंगलबार र बुधबार २ दिन सरकारी कार्यालयहरू खुलेका छन् । छठ पर्व मनाउनका लागि सरकारले २ दिन सार्वजनिक बिदा दिएको छ। छठका लागि संघीय सरकारले बिहीबार बिदा दिएको छ ।

कोशी प्रदेश सरकारले शुक्रबार प्रदेशका १४ वटै जिल्लामा छठ समापनको बिदा दिएको हो। सूर्यदेवको उपासना गर्दै ४ दिनसम्म मनाइने छठ शुक्रबार उदाउँदो सूर्यलाई अर्घ दिएर समापन गरिने छ । मंगलबारदेखि छठ सुरु भएको छ। पहिलो दिन नहाय खाय मनाइएको छ। दोस्रो दिन अर्थात बुधबार खरना पर्व मनाइन्छ।

तेस्रो दिन बिहीबार छठको मुख्य दिन हो । तेस्रो दिन अस्ताउँदो सूर्यलाई जलाशय किनारबाट अर्घ दिने परम्परा छ। अन्तिम दिन शुक्रबार बिहान उदाउँदो सूर्यलाई अर्घ दिएपछि छठ पर्वको विधिवत् रूपमा समापन हुने छ। तराई मधेसमा छठ पर्वको तयारी भइरहेको छ । छठको पूजाका लागि बजारमा किनमेल गर्नेको भिड लागेको छ।

नदी, पोखरी तथा जलाशयलाई सजाउन थालिएको छ। कात्तिक २४ गते अर्थात शनिबार त्यसै पनि सार्वजनिक बिदा हो। प्रदेश सरकारले कात्तिक २५ गते आइतबारसमेत सार्वजनिक बिदा दिएको छ। राष्ट्रिय विभूति एवं किराँत धर्मगुरु फाल्गुनन्दको जन्मजयन्तीको अवसरमा प्रदेशमा सार्वजनिक बिदा दिइएको हो।