अलपत्र खानेपानी आयोजनाका लागि बजेट बिनियोजन हुन्छ –खानेपानी मन्त्री राई

वैशाख २९ , साेलुखुम्बु ।  संघिय सरकारको खानेपानी मन्त्री राजेन्द्र कुमार राईले जिल्लाका अलपत्र योजनाहरुको पुर्णताका लागि आगामी आर्थिक बर्षमा बजेट ब्यबस्था हुने बताउनुभएको छ । सोलुखुम्बु जिल्लाको अनुगमन भ्रमणमा रहनुभएका मन्त्री राईले पत्रकारहरुको प्रश्नको जवाफ दिदै यस्तो बताउनुभएको हो । जिल्लामा संघिय सरकारका थुप्रै खानेपानी आयोजनाहरु अलपत्र रहेको गुनासो पश्चात ती सबै आयोजना सम्पन्न गर्नका लागि बजेट बिनियोजन गर्ने मन्त्री राईको भनाई छ । एमाले पार्टी कार्यालय सल्लेरीमा कार्यकर्ता भेटघाट तथा अन्तक्रिया कार्यक्रमका दौरानमा जिल्लाका खानेपानी केन्द्रित समस्याहरु मन्त्री समक्ष प्रस्तुत गरिएको थियो । उक्त कार्यक्रममा एमाले केन्द्रिय सदस्य यज्ञराज सुनुवार, संघिय सांसद मानवीर राई, एमाले जिल्ला अध्यक्ष डुफ कुमार बास्तोला लगायतका जिल्लास्तरिय नेताहरु सहभागी थिए । यसअघि मन्त्रीलाई जिल्लामा स्वागत गर्दै प्रमुख जिल्ला अधिकारी देवी पाण्डे खत्रीले खानेपानीको अभावका कारण कारागारमा निक्कै समस्या सिर्जना भएको गुनासो पोख्नुभएको थियो । मुहान प्रशस्तै भएपनि त्यसको व्यवस्थापनमा ध्यान नपुगेको प्रमुख जिल्ला अधिकारी खत्रीको गुनासो थियो ।