ओखलढुंगाको खोदोम्पा मगर समाजको देउसीबाट झण्डै ४ लाख रकम संकलन

कार्तिक २४, सोलुखुम्बु । ओखलढुंगाको मगर सेवा समाजले देउसीबाट झण्डै ४ लाख रकम संकलन गरेको छ । ओखलढुंगा सिद्धिचरण नगरपालिका ९ का खोदोम्पा मगर सेवा समाजले यस वर्षको देउसी भैलो कार्यक्रमबाट झण्डै ४ लाख रकम संकलन गरेको हो ।

सदरमुकाम बजार क्षेत्रबाट २ लाख ८ हजार र समाज गुठीबाट एक लाख ६९ हजार गरी जम्मा ३ लाख ७७ हजार रुपैयाँ रकम संकलन भएको सेवा समाजका अध्यक्ष कालुमान मगरले जानकारी दिनुभयो । अध्यक्ष मगरका अनुसार यस वर्ष गुठी समाजले साँस्कृतिक भेषभुषा, डेक, स्पिकर जस्ता सामग्री खरिद लगायतमा खर्च हुँदा संकलित रकमबाट एक लाख २० हजार मात्रै बचत भएको छ ।

यस रकम र गुठीको आर्थिक रकमले समाजका लागि ट्रष्टको भवन निर्माण गर्ने छलफल भईरहेको अध्यक्ष मगरले बताउनुभयो । मगर समाजले कार्तिक १६ गते देखि ओखलढुंगा सिद्धिचरण पार्कबाट देउसी तथा साँस्कृतिक कार्यक्रम शुरु गरेको थियो । १९ गतेसम्ममा सदरमुकामको बजार क्षेत्र र खोदोम्पा गाउँको गुठी समाजमा देउसी तथा साँस्कृतिक कार्यक्रम गरेको हो ।