काँग्रेस सोलुको बैठक मंगलबार, एक पक्ष सहभागी नहुने २ सचिवको चेतावनी

२५ कात्तिक, सोलुखुम्बु । नेपाली काँग्रेस सोलुखुम्बुको बैठक पार्टी सभापतिले आगामी मंगलबारको लागि तय गरेका छन् । काँग्रेसको १ सय दिने अभियानका क्रममा पार्टीका केन्द्रिय प्रतिनिधि तथा केन्द्रिय सदस्य अमृत अर्यालको उपस्थितिमा बैठक बस्ने गरि पार्टी सभापति नाम्गेल जाङबु शेर्पाले पत्राचार गरेका छन् ।

अभियान सम्बद्ध कार्यक्रम कार्यान्वयन गर्न बैठक बस्ने भन्दै उपस्थितिका लागि कार्यसमितिका पदाधिकारी, जिल्लाबाट प्रतिनिधित्व गर्ने केन्द्रिय सदस्यहरु, तल्लो तहका समितिका सबै पदाधिकारी र निर्वाचित जनप्रतिनिधिहरुलाई सभापति शेर्पाले पत्राचार गरेका हुन् ।
यता काँग्रेसकै अर्को पक्ष भने बैठकमा सहभागि नहुने भएको छ । पार्टीका २ जिल्ला सचिवहरु युवराज घिमिरे र भलाकाजि राईले केन्द्रिय प्रतिनिधि अमृत अर्याललाई ध्यानाकर्षण पत्र लेख्दै बैठकमा एक पक्ष सहभागी नहुने बताएका हुन् ।

उनीहरुले विभिन्न ७ बुँदे ध्यानाकर्षण लेख्दै पार्टी सभापति विधि विधान विपरित एकलौटी ढंगले अगाडी बढेको भन्दै बहुमत जिल्ला समिति तथा महाधिबेशन प्रतिनिधिहरु सहभागि नहुने उल्लेख गरेका छन् ।

उनीहरुले सभापति हरेक कुरामा एकलौटी अगाडी बढेको, भातृ संस्थाहरु मनोमानी ढंगले गठन गरेका तथा क्रियाशिल सदस्यता नविकरण फारम अबैधानिक ढंगले वितरण गरेको जस्ता आरोप लगाएका छन् । यो सँगै काँग्रेस सोलुको कात्तिक २७ गते मंगलबार बस्ने बैठकमा काँग्रेसको एक खेमा सहभागि नहुने देखिएको छ ।