धार्मिक तथा पर्यटकीयस्थल बराहपोखरीमा एकादशी मेला

कार्तिक २७, सोलुखुम्बु । खोटाङको बराहपोखरी गाउँपालिका १ मा अवस्थित धार्मिक तथा पर्यटकीयस्थल बराहपोखरीमा एकादशीका दिन भव्य मेला लागेको छ । एक सय गन्तव्य सूचीमा समावेश भएको बराहपोखरीमा हिजो साझँबाटै भव्य मेला लागिरहेको हो ।

प्राकृतिक रुपले बनेको पोखरीको पानीले स्नान गर्दा रोग व्याधि निको हुने तथा आफ्नो मनोकाक्षा पुरा हुने धार्मिक मान्यता अनुसार दर्शनार्र्थी तथा धामी झाक्रीहरुको भिड लाग्ने गर्दछ ।

सडक विस्तारसँगै केही वर्षयता बराहपोखरीमा आन्तरिक तथा बाह्य पर्यटकको चाप बढ्दै गएको गाउँपालिका अध्यक्ष शालिकराम बन्जराले बताउनुभयो । मेला अवधिभर त्यहाँ वालन र संगिनीलगायतका नाच प्रस्तुत गरिने बराहपोखरी गाउँपालिका १ वडा अध्यक्ष ढक बहादुर कार्कीले बताउनुभयो ।

चारैतिर घना जङ्गलले घेरिएको करीव पाँच रोपनी भन्दा वढी क्षेत्रफलमा फैलिएको पोखरीमा विश्वमै दुर्लभ मानिएको रातो माछा पाईन्छ । पर्यटनको प्रचुर सम्भावना भएपनि ओझेलमा रहेको बराहापोखरीमा हरेक रामनवमी, शिवरात्री, बालाचतुर्दशी, माघे संक्रान्तिका दिन सतबीज छर्ने चलन छ ।