ओखलढुंगामा चट्याङ लागेर ४ जना घाइते

बैशाख ३०, साेलुखुम्बु । ओखलढुंगाको लिखु गाउँपालिका ३ को जोगी गाउँमा आज विहान ६:३० बजेको समयमा चट्याङ लागेर ४ जना घाइते भएका छन् । स्थानीय कृष्णबहादुर जोगीको घरमा चट्याङ लाग्दा उनकी श्रीमती अन्दाजी ३८ वर्षीया कल्पना जोगी, छोरा अन्दाजी १६ वर्षीय आशिष जोगी, १३ र १० वर्षीया छोरीहरु पुजा जोगी र आरती जोगी घाइते भएको जिल्ला प्रहरी कार्यालय ओखलढुंगाले जनाएको छ । उनीहरु चट्याङ लागेर बेहोस भएको तर अहिले होसमा आएको प्रहरीको भनाई छ । उनीहरुको अवस्था सामान्य रहेको र हाल हातखुट्टाहरु झम-झमाउने समस्या भइरहेकोले उपचारको लागि अस्पताल पठाउने तयारी भइरहेको छ । चट्याङको कारण उक्त घरको बिद्युतको मिटर बक्समा समेत क्षती भएको प्रहरी भनाई छ ।