गत अा/वमा थुलुङ दुधकोशीको  वित्तीय प्रगति झण्डै ९२ प्रतिशत 

कार्तिक २८, सोलुखुम्बु । सोलुखुम्बुको थुलुङ दुधकोशी गाउँपालिकाले गत आर्थिक वर्षमा ९१ प्रतिशत बढी वित्तीय प्रगति हासिल गरेको छ । गाउँपालिकामा बुधबार सम्पन्न गत आर्थिक वर्ष २०८१/८२ को वित्तिय समीक्षाका क्रममा गाउँपालिकाले ९१ दशमलव ५८ प्रतिशत वित्तिय प्रगति हासिल गरिएको बताइएको हो ।  

गाउँपालिका अध्यक्ष असिम राईकाे अध्यक्षतामा बसेको बैठकले गत आ/व वर्षको समीक्षा सहित अन्य विभिन्न महत्वपूर्ण निर्णय गरेको प्रवक्ता भोजराज कार्कीले बताउनुभयो । बैठकमा गाउँपालिकाले पालिका भित्रका घरलाई वैज्ञानिक दर्ता प्रक्रिया सुरुवात गर्ने निर्णय गरेको जनाइएको छ ।  

जुन निर्णय अनुसार अव गाउँपालिकामा घर बनाउनुपूर्व नक्सा पास गर्नुपर्ने प्रावधान सुरु हुने भएको छ ।  त्यसको लागी आजैको बैठकले गाउँपालिकाको वडा नम्बर ७ का अध्यक्ष तथा प्रवक्ता भोजराज कार्कीको संयोजकत्वमा ३ सदस्यीय समिति समेत गठन भएको छ ।  समितिले १५ दिन भित्र कार्ययोजना सहितको प्रतिवेदन पेश गर्ने जिम्मेवारी प्राप्त गरेको छ । यस्तै गाउँपालिकाले अव विद्यालयहरूको प्रोफाइल निर्माण गर्ने भएको छ ।

 गाउँपालिका भित्र रहेका ३६ वटा सामुदायिक विद्यालयको स्कुल प्रोफाइल निर्माण गरिने जनाइएको हो । गाउँपालिका अध्यक्ष असिम राईले वार्षिक समीक्षाले पालिकाको कामलाई थप प्रभावकारी बनाउन मलजल गर्ने भएकाले यसलाई सफल अभ्यासको रूपमा स्थापित कार्यलाई निरन्तरता दिने र विद्यमान चुनौतीहरूलाई समयसापेक्ष समाधान गर्दै चालु आर्थिक वर्षलाई थप प्रभावकारी बनाउन सम्पुर्ण पक्ष थप जिम्मेवार बन्ने बताउनुभएको छ ।