सोलुदुधकुण्ड नगरपालिका वडा नम्बर १० कोे प्रशासनिक भवन निर्माणले गति लिदै

कार्तिक २९, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर १० टाप्टिङको वडा प्रशासनिक भवन निर्माणले गति लिन थालेको छ । गत कार्तिक ७ गते शिलान्यास गरिएको वडा प्रशासनिक भवन निर्धारित समयभन्दाअघि नै वडा कार्यालयलाई भवन हस्तान्तरण गर्ने गरी निर्माण व्यवसायीले कामलाई गति दिएका छन् ।

भ्याट सहित १ करोड १४ लाख ३० हजारमा निर्माण भइरहेको वडा कार्यालय भवनको ठेक्का ग्रिन तारा कन्ट्रक्सनले २०८० साल साउन १९ गते सम्झौता गरेको छ । उक्त भवन २०८२ साल जेठ ३० गतेसम्म निर्माण सम्पन्न गरिसक्नुपर्ने सम्झौतामा उल्लेख गरिएको छ । उक्त भवन २०८२ साल जेठ ३० गतेसम्म निर्माण सम्पन्न गरिसक्नुपर्ने उल्लेख गरिएको छ । करीब २ रोपनी क्षेत्रफलमा २ तले र ७ वटा कोठाहरु सहितको भवन सुविधा सम्पन्न हुने बताइएको छ ।

अहिले साँघुरो ठाउँबाट सेवा प्रवाह भइरहेकाले अब नयाँ भवनको निर्माण आरम्भसँगै चाँडै नै सुविधा सम्पन्न प्रशासनिक कार्यालयबाट वडाबासीले सुविधा पाउने सोलुदुधकुण्ड नगरपालिका वडा नम्बर १० का वडा अध्यक्ष होम बहादुर मगरले विश्वास लिनुभएको छ । सो भवन पुरानो गाविस भएको ठाउँमा बनिरहेको जनाइएको छ ।