सोताङका किसानलाई अनुदानमा गहुँको बीउ

कार्तिक २९, सोलुखुम्बु । सोलुखुम्बुको सोताङ गाउँपालिकाका किसानलाई अनुदानमा गहुँको बीउ वितरण गरिएको छ । एक हजार दुई सय चार किलो उन्नत जातको बीउ वितरण गरिएको कृषि शाखा प्रमुख मोनिका पौडेलले जानकारी दिनुभयो । उहाँका अनुसार नेपाल कृषि अनुसन्धान परिषद् धनकुटाबाट ल्याईएको हिमगंगा, खुमल शक्ति र डब्लुके जातको गहुँ वितरण गरिएको हो ।

हाल सम्म सोताङका ७० घरपरिवार र १ कृषि समूहले अनुदानमा गहुँको बीउ प्राप्त गरेका छन् । सार्वजनिक सूचना जारी गरी किसानको मागका आधारमा बीउ उपलब्ध गराइरहेको कृषि शाखाले जनाएको छ । गाउँपालिकाले प्रति के.जि ८० रुपैयाँले खरिद गरि ७५ प्रतिशत छुटमा गहुँको बिउ बिक्री गरिएको जनाईएको छ ।

व्यावसायिक रूपमा कृषि गर्दै आएका किसानलाई अनुदानमा बीउ वितरण भएपछि यो वर्ष गहुँ उत्पादन बढ्ने आँकलन गरिएको छ । कृषिमा उत्पादन बढाउने हिसाबले नीति तथा कार्यक्रममा समावेश गरी योजना बनाइएको गाउँपालिका अध्यक्ष खिलराज बस्नेतले बताउनुभयो । पालिकाको अनुदान सहयोगमा बीउ पाएपछि किसानमा उत्साह थपिएको छ ।