सल्लेरीमा बजार अनुगमन, करिव १४ हजारको अखाद्य बस्तु जफत 

मंसिर १, सोलुखुम्बु । सोलुखुम्बुको सदरमुकाम सल्लेरीमा बजार अनुगमन गरिएको छ ।  जिल्ला प्रशासन कार्यालय सोलुखुम्बुका सहायक प्रमुख जिल्ला अधिकारी तथा बजार अनुगमन समितिका संयोजक रूपेश विश्‍वकर्माकाे नेतृत्वमा सदरमुकाम क्षेत्रको अावाडाँडाका १८ वटा होटल तथा पसलहरू अनुगमन गरिएको हो ।

 बजार अनुगमनका क्रममा अनुगमन टोलीले करिव १४ हजार बराबरको अखाद्य बस्तु जफत गरेको छ ।  टोलीले सो क्षेत्रका ४ वटा होटल, ९ वटा पसल, कस्टमेटिक, मासुपसल, फलफूल तथा तरकारी पसल, बेकरी र चजि पसल १/१ वटा गरि जम्मा १८ ओटा होटल तथा पसल अनुगमन गर्दा १३ हजार ५ सय ६० रुपैयाँ बराबरको अखाद्य तथा म्याद गुज्रिएका सामाग्री जफत  गरिएको छ ।  

दशैँ अघि सल्लेरीकाे कोर बजार क्षेत्र अनुगमन गरिएको र अहिले माथिल्लो क्षेत्रमा क्रमशः बजार अनुगमनलाई बढाउँदै नागरिकको उपभोक्ता अधिकार संरक्षणमा प्रशासन जिम्मेवार रहेको सहायक प्रमुख जिल्ला अधिकारी विश्वकर्माले बताउनुभयो । बजार अनुगमनका लागी प्रशासन, घरेलु तथा साना उद्योग कार्यालयका प्रमुख नारायण प्रसाद खतिवडा, सोलुदुधकुण्ड नगरपालिकाका प्रतिनिधि, उद्योग वाणिज्य सङ्घ सोलुखुम्बुका प्रतिनिधि जिवननाथ बाँस्तोला लगायत प्रहरी र सरोकारवालाको उपस्थिति रहेको थियो   ।