हिमाली क्षेत्रको सरसफाइ गर्न एसपिसिसिको ८ दिने अभियान, अझै ५ दिन जारी रहने 

मंसिर १, सोलुखुम्बु । सोलुखुम्बुको खुम्बु पासाङ ल्हामु गाउँपालिका भित्रको व्यस्त पर्यटकीय क्षेत्र नाम्चे र थामेको सरसफाइ सुरु भएको छ ।  सगरमाथा प्रदुषण नियन्त्रण समितिको आयोजनामा तेन्जिङ नोर्गे फाउण्डेसन र भ्याली पिक आउट लुक फाउण्डेसनले खुम्बु पासाङ ल्हामु गाउँपालिका वडा नम्बर ४ र ५ का विभिन्न क्षेत्रमा सरसफाइ सुरु गरेको हो ।

पर्यटकीय क्षेत्रमा भएको प्लाष्टिक लगायत अन्य विभिन्न फोहरका कारण गलत सन्देश जानुका साथै हिमाली क्षेत्रको जलवायुमा असर पार्ने भएकाले कार्तिक २९ गतेबाट ८ दिने सरसफाइ अभियान सुरु गरिएको सगरमाथा प्रदुषण नियन्त्रण समितिका अध्यक्ष लामाकाजी शेर्पाले बताउनुभयो । नेपाल प्रहरी, नेपाली सेना र फाउण्डेसनहरुको जागरुकतामा स्थानीय तथा संघसंस्थाहरु सहित करिव ३६ जनाको टोली सरसफाईमा खटिएको जिल्ला प्रहरी कार्यालय सोलुखुम्बुले जनाएको छ ।

थामे क्षेत्रमा पर्ने रेन्जोला पास सरसफाइ अभियान आगामी मंसिर ५ गते सम्म चल्ने तेन्जिङ नोर्गे शेर्पा फाउण्डेसनका सञ्चालक तेन्जिङ शेर्पाले बताउनुभयो । अभियानले गाउँपालिकाको वडा नम्बर ४ र ५ का थामे, नाम्चे, ठमु, रेन्जो पास, गोक्यो, मछेर्मा, डोल हुँदै नाम्चे बजार क्षेत्रका विभिन्न ठाउँमा सरसफाइ गर्ने कार्यालयले जनाएको छ ।  इलाका प्रहरी कार्यालय नाम्चेको प्रहरी टोली समेत उक्त अभियानमा सक्रियता पूर्वक लागेर पर्यटकीय क्षेत्रको सरसफाइमा हातमा हात मिलाइरहेको कार्यालय प्रमुख द्वारीका प्रसाद घिमिरेले बताउनुभयो ।