एभरेष्ट रिपाेर्टिङ प्रभाव – उपचार अभावमा थलिएकी पेमाको उपचारकालागी १ लाख बढी सहयोग 

मंसिर २, सोलुखुम्बु ।  पैसाको अभावमा उपचार गर्न नसक्दा अलपत्र परेकी पेमाको उपचारका लागी १ लाख १५ हजार रुपैयाँ सहयोग प्राप्त भएको छ । सोलुखुम्बुको सोलुदुधकुण्ड नगरपालिका वडा नम्बर ६ की पेमा शेर्पाको उपचारका लागी शेर्पा किदुक रोमानियाबाट १ लाख १५ हजार रुपैयाँ सहयोग प्राप्त भएको हो ।

 उनलाई रोमानीयामा रहेका शेर्पा दाजुभाइहरूको पहलमा १ लाख १५ हजार रुपैयाँ सोलुदुधकुण्ड नगरपालिका वडा नम्बर ६ दोर्पुका अध्यक्ष फुर्वा ग्याल्जेन शेर्पा मार्फत सहयोग प्राप्त भएको हो ।  रेडियो एभरेष्टबाट केही समय अगाडि प्रसारितत एक भिडियो हेरेपछि सहयोगी हातहरुले सहयोग पठाएको अध्यक्ष शर्पाले बताउनुभयो । उनलाई प्राप्त सहयोग आज जिल्ला अस्पताल फाप्लु पुगेर अध्यक्ष शेर्पाले हस्तान्तरण गरिएको छ ।  

रोजगारको सिलसिलामा काठमाण्डौ छिरेकी पेमा ठुलो रोग लिएर घर फर्किइन । गरिब परिवारमा जन्मिएकी पेमालाई काठमाण्डौमै हुँदा रोगले च्यापिसकेको थियो । हेरचाहको अभावमा  त्यो रोगले  दिनप्रतिदिन बढ्दै गएपछि गाडी चढेर सोलुखुम्बु आइन र गाडीले उनलाई जिल्ला प्रहरी कार्यालय सोलुखुम्बुको गेटमा छाडिदिएपछि प्रहरीले अस्पताल पु¥याएको थियो ।

जिल्ला अस्पताल फाप्लुका डाक्टर प्रशान्त शाहका अनुसार अहिले पेमा सुधारोन्मुख छिन ।  उनको नियमित उपचार भइरहेको छ ।  सकेसम्म हर सम्भव प्रयास गरि उनलाई खतरा भन्दा बाहिर ल्याइएको डाक्टर शाहको भनाई छ ।  उहाँले अस्पतालले निशुल्क उपचार सुरु गरेकोमा अहिले सहयोग प्राप्त भइरहेको बताउनुभयो ।