एभरेष्ट ट्रेल रेसको उपाधि सुमन कुलुङ र छोकी शेर्पालाई

मंसिर ६, सोलुखुम्बु । हिमाली जिल्ला सोलुखुम्बुमा आयोजित एभरेस्ट मेराथुन ट्रेल रेसको उपाधि पुरुषतर्फ सुमन कुलुङ राई र महिला तर्फ छोकी शेपाले जितेका छन् । सुमन कुलुङले पत्तालेमा आयोजित १ सय ७० किलोमिटरको रेस प्रतियोगितामा १९ घण्टा २८ मिनेटमा दुरी पार गरी उपाधि जितेका छन् ।

यस्तै दल बहादुर कुवारले २० घण्टा २० मिनेट दुरी पार गरि दोस्रो र मन कुमार रोक्का मगरले २० घण्टा २९ मिनेट दुरी पार गरी तेस्रो भएका छन् । महिला तर्फ छोकी शेर्पाले २८ घण्टा १३ मिनेट दुरी पार गरि पहिलो, हुमी बुद्ध दोस्रो र लाय गिलिवेट्स तेस्रो भएका छन । सोलुखुम्बुको पत्ताले धापबाट शुरु भएको दौड पिके डाँडा, जुनबेसी, थुप्तेनछोलिङ, रिङमु, टाक्सिन्दु, खरीखोला, फाक्दिङ, नाम्चे हुँदै फोर्चे पुगेर त्यहाँबाट खुम्जुङ हुँदै नाम्चेबाट लुक्लामा समापन भएको जनाइएको छ ।

अन्नपूर्ण ट्रेक एण्ड स्पिडिसिन कम्पनीको आयोजनामा नेपाली साहसिक पर्यटकीय गतिविधिको विश्वभर प्रवर्धन गर्ने उद्देश्यले एभरेस्ट ट्रेल रेसको आयोजना गरिएको थियो ।