महिला मानव अधिकार रक्षक संजालको जिल्ला अध्यक्षमा श्रेष्ठ चयन

मंसिर ६, सोलुखुम्बु । महिला मानवअधिकार रक्षकहरुको जिल्ला संजाल सोलुखुम्बुमा नयाँ नेतृत्व चयन भएको छ । बधबार आयोजित महिला मानव अधिकार रक्षक संजाल सोलुखुम्बुको पाँचौ औँ अधिबेशनले नयाँ नेतृत्व चयन गरेको हो ।

राधिका श्रेष्ठको अध्यक्षतामा गठित १५ सदस्यीय समितीको उपाध्यक्षमा रत्न कुमारी शर्मा, सचिवमा गिता कार्की, सह सचिवमा निर्मला राउत, कोषाध्यक्षमा शारदा माया तामाङ चयन भएको जनाइएको छ । यसअघि कार्यक्रममा बोल्दै महिला मानवअधिकार रक्षकहरुको संजालका केन्द्रिय अध्यक्ष टकिं माया बस्नेतले समुदायमा काम गर्ने महिलाहरुलाई अझै पनि सहज वातावरण सिर्जना नभएको बताउनुभयो ।

कुनैबेला मानव अधिकारकर्मी भन्ने बित्तिकै पुरुष हो भन्ने बुझाइ रहेको स्मरण गर्दै स्वच्छ र निष्पक्ष अधिकार स्थापित गर्नुमा महिला मानव अधिकारको अमुल्य योगदान रहेको धारणा राख्नुभएको छ । राजनितिक अस्थिरताले मानव अधिकारको दायरा छायामा पर्न नहुने तर्क गर्दै अधिकारको अभियानमा लाग्नेले राजनितिक आस्था भन्दा माथी उठेर सही र गलत छ्ट्याउनुपर्ने उल्लेख गर्नुभयो ।